Edi Rama ka bërë sonte një bilanc politik të vitit 2017, ndërsa vlerësoi si arritjen më të madhe fitoren e Partisë Socialiste në qershor. Duke e cilësuar marrëveshjen me Lulzim Bashën si një risi që solli viti që po lëmë pas, kryeministri u shpreh se fatkeqësisht ‘hija’ e opozitës së para-marrëveshjes ka nisur të rishfaqet.
“Ne nuk kemi pasur asnjëherë një marrëveshje se kush do të humbasë apo kush do të marrë çfarë nga zgjedhjet, sepse atë do ta përcaktonte populli shqiptar. Mënyra më e dëshpëruar për të justifikuar një humbje që kishte të gjitha arsyet që të vinte, është kjo mënyrë për të mos pranuar humbjen dhe për t’ju përveshur edhe njëherë tjetër me baltë kundërshtarit pa kursyer Shqipërinë. Nuk është problemi tek çfarë thotë opozita për mua, apo qeverinë, por është se nuk po kursen Shqipërinë në këtë proces”, tha Rama.
Lidhur me akuzat për lidhjen me krimin, Rama tha se akuzat kanë qenë politike dhe se PS ka qenë e para parti që ka kërkuar dëshmi penaliteti si një filtër para se të hynte në fuqi dekriminalizimi.
“Timonieri” i vetëm i qeverisë tha mbrëmjen e së enjtes për Top Story se blerja e votave më 25 qershor me paratë e hashashit tha se opozita ka komentuar gjërat që ka zbuluar qeveria. Sipas Ramës, mazhoranca e sotme ka bërë publike dhe transparente komunikatat e policisë që deri në 2013-ën ishin sekrete.
Sipas tij, sot publiku mund te njihet për rezultatet e operacioneve policore, asgjësimin e bimëve narkotike dhe të dhëna të tjera mbi luftën kundër drogës.
Sipas Ramës, nëse sot do të mbaheshin zgjedhje, Partia Socialiste do të merrte 78 deputetë.
“Këto janë të dhëna nga sondazhet e fundit. Këto i di edhe Ilir Meta, se edhe ai bën sondazhet e tij…” – tha Rama.
Rama ka komentuar edhe karakterin e Bashës, që sipas tij “është një djalë artist”.
Ai tha se Basha ka një aftësi të pamohueshme për të thënë atë që nuk mendon. Dhe të mendojë atë që nuk thotë.
/JavaNews/b.d
