“Ti themi ndal politikës së vjetër! Le t’ju imponohemi!”

Nga Ana Abdi*

Ka nga ata që thanë  që “Shqipëria nuk bëhet”, por ka edhe nga ata që thane që “Shqipëria do edhe 20 vite të bëhet”

Duket sikur ne shqiptarët i jemi dorëzuar fatit, e si për të thënë që nuk është kështu, themi edhe shprehjen tjetër “Rinia është e ardhmja”. Kjo shprehje në vend që të japë shpresë, personalisht më ngjan si neglizhencë a tallje, një shtyrje në kohë, si për ti thënë rinisë “Prisni, ju jeni për më vonë”. Si mund të jetë rinia e ardhmja, kur ajo nuk bën asgjë, por shikon se si çdo ditë i imponohet një realitet i dhunshëm nga gjuha që përdor politika. Kjo gjuhë e urrejtjes që nuk i drejton qytetarët drejt debatit e informacioneve se çfarë po bëjnë të zgjedhurit e tyre, kryesisht në Kuvend, përkundrazi me qëllim i shmang e i largon ato nga thelbi i politikës së ditës, “Reforma në Drejtësi”. Kjo gjuhë e urrejtjes detyron këtë të gjorë popull të dëgjojë zhargonin e mllefin, deri në sharje e ofendime të familjarëve në katër breza, një debat që nuk sjell kurrëfarë dobie e vlere.

Unë vërtet mendoj që rinia është e ardhmja, por jo që rinia duhet të presë të ardhmen për të vepruar. E ardhmja jonë duhet të fillojë tani! Ajo fillon nga sot, duke vepruar, duke u dëgjuar zëri ynë!

Kush janë këta që në emër të lirisë së fjalës shajnë e ofendojnë këdo që i cënon interesat financiare e politike? Kush janë këta që në emër të të drejtës së protestës zënë dhe mbajnë peng rrugët e vendit? A nuk u lodhën së përgjakuri dhe përdhosuri atë Bulevard në 2011, por kanë dy muaj që e kanë marrë peng? Kush janë këta, më thoni, ku e gjejnë guximin të tallen në këtë mënyrë me një popull që e kanë torturuar e cfilitur sa herë ju është dhënë mundësia? Kush ja u jep këtë guxim? Urtësia jonë?!!

Ndihem fajtore të rri dhe të hesht akoma ndaj parodisë së asaj çadre! Sa më shumë ky popull hesht, aq më shumë tradhëtarët e tij triumfojnë.. Po, po, tradhëtarë, që e kanë shitur e blerë këtë vend sa herë ju është dhënë mundësia, për interesa të xhepit e të pushtetit…

Shumë të nderuar të rinj demokratë, socialistë e pa parti… Ngrehuni dhe thojini ti thërrasin mëndjes! Mos i lini të tallen me ju në emër të demokracisë… Kërkojini të çohen dhe të futen në Kuvend! Thojini dhe kërkojini të mos tallen me ne dhe me taksat tona! Po edhe me taksat e mia dhe të prindërve të mi, sepse dhe unë, njësoj si ju, dua që opozita e popullit tim të jetë konstruktive, të jap argumenta e të gjenerojë debat, sepse vetëm kështu Shqipëria jonë, vendi ku të gjithë jetojmë, mund të jetë më i mirë… As unë, nuk dua një opozitë me dëngla e fjalë boshe, të një çunaku që kërkon të imponohet si politikan.

Të rinj, demokratë, socialist dhe pa parti,

Kërkojini t’ju përfaqësojnë denjësisht ose thojini të lëshojnë mandatet! Thojini, edhe fort po të jetë nevoja që ju doni integrimin e Shqipërisë! Thoni që e ardhmja jonë e vetme është “Reforma në Drejtësi”…

Kam shumë shpresë që ne të rinjtë nuk do të bëhemi factor regresi me heshtjen tonë, por do ti braktisim dhe pot ë jetë nevoja do ti dënojmë! Nuk duam gjuhë urrejtje dhe as lojëra fjalësh për politikë stabiliteti! Ne të rinjtë duhet t’i vëmë ultimatum atyre që na cënojnë të ardhmen:

“JO GJUHËS SË URREJTJES! Hyni në Kuvend dhe VOTONI Reformën!” Kjo është koha jonë!