Tetë trupa të copëtuar u gjetën të dielën të varrosur fshehurazi në një minierë të paligjshme në provincën jugore ekuadoriane të Asuay, tha policia.
Trupat ishin “varrosur në një thellësi prej rreth dy metrash”, kishin duart e lidhura dhe tregonin “trauma të tilla si copëtimi dhe prerja e kokës” të shkaktuara me hanxharë, tha për shtypin Pablo Iga, një oficer i lartë i policisë gjyqësore.
Viktimat u gjetën në zonën e Pukarës, ku minierat e paligjshme të arit dhe bakrit janë intensifikuar vitet e fundit dhe ku banda Los Lobos (“ujqërit”) konsiderohet dominuese.
Sipas analizave paraprake, trupat u varrosën në minierë rreth dy ditë më parë. Identitetet e viktimave nuk janë konfirmuar në këtë fazë.
Pavarësisht politikës anti-banda, “luftës” së shpallur kundër bandave nga presidenti i krahut të djathtë Daniel Noboa, dhuna nuk ndalet në Ekuador, ku bandat përleshen për kontrollin e rrugëve të trafikut të drogës dhe aktivitetit të paligjshëm të minierave.
Policia ishte vendosur në zonën e paarritshme kur mori informacion për të shtëna me armë.
Banorët kanë raportuar tek autoritetet se të dashurit e tyre janë zhdukur.
Asuay është një nga dhjetë provincat në Ekuador që kanë qenë në gjendje të jashtëzakonshme që nga qershori për shkak të një rritjeje të dhunës me armë.
Ekuadori, dikur një oaz paqeje dhe qetësie në Amerikën Latine, është bërë vitet e fundit vendi më i rrezikshëm në të gjithë rajonin. Në vitin 2025, shkalla e vrasjeve arriti në 51 për 100,000 banorë, më e larta në të gjithë Amerikën e Jugut, sipas të dhënave nga “InSight Crime”.
