Nga Artur Ajazi
“Lumi që mori Vunonë, pse nuk mori dhe Qeparonë”. Eshtë fjalë e urtë bregdetase, që popullsia e zonave Jugperëndimore e vendit e përdor nuk ka dhe kalon situata të sikletshme. Ajo që po ngjet në Partinë Demokratike (në fakt në Partitë Demokratike) të Berishës dhe Bashës, ngjet si dy pika uji me situatën e paravitit 1941, kur grupet komuniste (i Korçës, i Zjarrit, i Shkodrës, i Të Rinjve) ziheshin mes tyre, kush do të kishte “komandën e drejtimit të një force të vetme politike në Shqipëri”.
E kujtojmë të gjithë se si vajti puna e asaj partie. Në PD sot, ka jo 1, por 11 rryma të ndryshme, që u shërbejnë Sali Berishës dhe Lulzim Bashës. Kush mendonte se “Luli ishte më paqësor se Saliu”, u bind për të kundërtën tek panë “blindimin” e dyerve të selisë, apo dhe mësymjen e “ushtarëve” të Foltores tek u kacafytën me ata të Bashës. Duke thyer rregullat e një bashkëjetese politike brënda një partie, duke thyer të gjitha nenet e Statutit të PD, dyshja Berisha-Basha, ka vendosur ta shkatërrojë nga themelet atë forcë politike.
Ngjarja e fundit e fyerjes dhe dhunimit të deputetëve “antibashë”, tregoi shkallën më të acarueshme të një situate e cila nuk jep shanse për ribashkim, apo dhe “rithemelimin” e PD. Dy ish-kryetarët, po mundohen me çdo formë dhe skenar të rizgjidhen në postet e drejtimit të partisë me rrugë të paligjshme, duke thyer çdo normë statutore.
Ikja e Berishës, rikthimi dhe “rizgjimi” i tij pas marrjes “non-grata” nga SHBA, akuzat e ndërsjellta mes tij dhe Bashës, përplasja mes grupimeve “të të fortëve”, tregon qartë se, PD nuk ka gjasa të shkëputet kurrë nga e shkuara. Basha, njeriu për të cilin shumë mendonin se “bëri gjënë e duhur me largimin”, vendosi të rikthehet.
Madje duke mundur të ozurpojë sërish shumicën e kryesisë së PD zyrtare, edhe pse mori kundërshtimin e shumicës së deputetëve dikur mbështetës. Në degët dhe bazën e asaj partie, nuk gjen sot asnjë anëtar apo militant mbështetës të besojë se, “rikthimi i Berishës, apo më keq akoma, rikthimi i Bashës, të jetë mundësia e ardhjes së PD në pushtet”.
Duke parë reagimet inatçore që vijnë nga shtabet e dy ish-kryetarëve, bindesh se “e ardhmja e asaj partie mbetet edhe më e zymtë në 2025”. Kush nuk e ka kuptuar se, PD ka mbaruar së funksionuari politikisht, shumë shpejt do të bindet kur të shikojë shkatërrimin e saj në zgjedhjet e ardhshme.
