Pas ngjarjes së rëndë të ndodhur këtë të hënë në ambientet e Gjykatës së Apelit në Tiranë, ku gjyqtari Astrit Kalaja u vra pas përfundimit të një seance gjyqësore, ka ardhur një reagim i fortë nga kryetari i Dhomës së Avokatisë, Maksim Haxhia.
Në një intervistë për gazetarin Besard Jacaj në televizionin Klan News, Haxhia bëri thirrje për reflektim dhe analizë të thellë nga institucionet, duke kërkuar që të merren masa konkrete për sigurinë në gjykata.
Po ashtu, Haxhia bëri apel për një ndërprerje të përkohshme të aktivitetit në sistemin e drejtësisë, në mënyrë që të kryhen analiza serioze dhe të ndërmerren masa të qarta për sigurinë e magjistratëve dhe pjesëmarrësve në proceset gjyqësore.
“Të mos punohet më! Dy-tri ditë të mblidhen institucionet, të bëjnë analizat dhe të marrin masat!”, tha Haxhia.
Po ashtu ai shtoi se edhe vetë si kryetar i Dhomës së Avokatisë ka vepruar m,enjëherë: “Kam dhënë urdhër të identifikohen kush janë avokatët e përfshirë në proces, sepse një avokat i mirë nuk është thjesht përfaqësues i klientit, ai ruan edhe gjyqtarin, prokurorin, policinë, dhe e përgatit klientin për çdo rezultat të mundshëm. Nuk duhet t’i thuhet vetëm ‘fiton’, por edhe kur nuk fitohet.”, tha Haxhia.
“E kisha student, Kalaja ishte njeri human”
Mes të tjerash, Haxhia shprehu tronditjen e tij për humbjen e gjyqtarit Kalaja, të cilin e kujtoi si një profesionist të rrallë dhe njeri me vlera të larta njerëzore.
“Në dhjetëvjeçarin e parë të karrierës time kam qenë në jetën akademike dhe kam pasur fatin ta kem student zotin Kalaja. E kam njohur si jurist, më pas si gjyqtar. Ishte jo vetëm një profesionist i shkëlqyer, por mbi të gjitha një njeri human. Jo sepse kështu thuhet pas vdekjes, por sepse vërtet ishte i tillë,” u shpreh Haxhia.
Ai theksoi se gjyqtari Kalaja nuk kishte pasur asnjëherë konflikte, presione apo vendime të kontestuara, duke shtuar se vendimet e tij kishin qëndruar gjithmonë në fuqi.
Lidhur me reagimet publike që kërkojnë dënime të ashpra për autorin, Haxhia tha se nuk ka nevojë për thirrje të tilla, pasi ligji është i qartë.
“Dëgjoj majtas-djathtas që të dënohet ashpër. Nuk ka nevojë të dënohet ashpër, sepse ligji e ka të qartë: kush cënon jetën e një gjyqtari apo prokurori, dënohet me burgim të përjetshëm. Çështja nuk është te dënimi, por te reagimi i menjëhershëm i shtetit. Që sot, sepse nesër është vonë.”, tha Haxhia.
