Presidenti ukrainas, Volodymyr Zelensky, do të zhvillojë vizitën e parë zyrtare në Beograd më 8 gusht, njoftoi zyra e presidentit të Serbisë, Aleksandar Vuçiç. Ende nuk ka detaje për vizitën në Beograd, por dy presidentët u takuan në mes të korrikut në Kiev, në kuadër të samitit Ukrainë-Evropa Juglindore.
Vuçiç konfirmoi se Zelensky do të vijë në Serbi dhe theksoi tre tema që do të jenë në tryezë – “rruga evropiane e Ukrainës dhe Serbisë”, bashkëpunimi dypalësh ekonomik dhe energjetik.
“Nuk duhet të harrojmë se Ukraina nuk e njohu Kosovën e pavarur, organizoi dy herë samitet e Evropës Juglindore-Ukrainë dhe se nuk ftoi përfaqësues të Prishtinës”, tha Vuçiç në reagimin e tij.
Duke iu përgjigjur pyetjes nëse Serbia do t’u bashkohej sanksioneve evropiane kundër Rusisë, Vuçiç theksoi se Serbia e ka krijuar politikën e saj katër vjet e gjysmë më parë.
Serbia e ka dënuar pushtimin rus të Ukrainës, që nisi më 2022, por refuzon t’u bashkohet sanksioneve që Bashkimi Evropian ka vendosur ndaj Moskës për shkak të luftës. Edhe pse është kandidate për anëtarësim në Bashkimin Evropian, Serbia për gati pesë vjet nuk ka hapur asnjë kapitull të ri negociues.
