SPAK po kërkon informacione të reja për tendera të tjerë të zhvilluar gjatë viteve të fundit në RTSH.
Kjo lëvizje e Prokurorisë së Posaçme kundër Krimit të Organizuar dhe Korrupsionit, zbulohet në ditën kur mbahej seanca për raportimin 2 mujor, për veprimet e kryera në kuadër të hetimit për ish-drejtorin e TVSH, Thoma Gëllçi.
Gëllçi është tashmë nën hetim për shpërdorim detyre, për një tender të dhënë në kohën që ka qenë drejtor i RTSH-së.
Sakaq, seanca gjyqësore ndaj Thoma Gëllçit është shtyrë për ditën e martë, 14 dhjetor 2021, ku do të paraqitet dhe mbrojtja.
Avokati i ish-drejtorit të RTSH-së, Dorjan Matlija ka deklaruar se zgjerimi i hetimeve është sipas tij “tregues kryesor që hetimi për tenderin e parë ka dështuar”.
AKUZA
SPAK ka regjistruar një procedim penal për veprën “shkelje të barazisë së pjesëmarrjes në tendera apo ankande publike“.
Nga hetimet ka rezultuar se Thoma Gëllçi ka kryer shkelje ligjore në një procedurë prokurimi, shkelje këto të kualifikuara në elementët e veprës penale “Shpërdorimi i detyrës”.
Bëhet fjalë për procedurën e prokurimit me objekt “Blerje pajisje për kanalin RTSH Agro”, me fond limit afro 87 milionë lekë të zhvilluar në datën 9 nëntor të vitit 2018.
Tre anëtarët e komisionit të vlerësimit të ofertave që u arrestuan bashkë me ish drejtorin janë: Ervin Muraj, Alban Malaveci, Julian Tapia.
g.kosovari
