Dokumentari hapet me pamje të Kosovës tre muaj pas çlirimit. Pasojnë imazhet e shtëpive të djegura, familjarëve që varrosin të afërmit e tyre e të tjerë që festojnë lirinë, shkruan Koha Ditore.Pamje të tilla që përcillen me hyrjen e KFOR-it shpalosen në minutat e para të dokumentarit “The Return” (“Kthimi”). Jo rastësisht ka marrë këtë emër. Bazohet në festivalin ndërkombëtar të muzikës dhe të teatrit me po të njëjtin emër të cilin aktorja e njohur botërore Vanessa Redgrave, do ta organizonte në shtator të vitit 1999 në Prishtinë.
“The Return” e kthen kohën 17 vjet prapa, pikërisht në të njëjtin vend ku u mbajt festivali: në Sallën e Kuqe. Në 60 minuta Adam Soch – filmbërës amerikan me preardhje rumune, i cili gjatë karrierës së tij ka bashkëpunuar me yje të mëdhenj të filmit, në mesin e të cilëve edhe Leonardo DiCaprio, Martin Sheen, Jessica Lange, Tommy Lee Jones, Jane Fonda dhe shumë të tjerë – ka dokumentuar prapaskenat e përgatitjeve, takimet e Redgrave me njerëzit e Kosovës, si dhe sekuenca nga koncertet.
Ajo kishte ftuar këngëtarë e artistë të huaj, me qëllimin që t’ia kthejë buzëqeshjen popullit, i cili sapo kishte mbyllur një faqe të hidhur të historisë. Philip Glass, Paticia Kaas, Lulu, bendi “Big Country”, valltaret e kompanisë “Martha Graham”, ylli italian i muzikës rock, Andrea Mignardi, Bruce Cockburn dhe kori i minatorëve nga Cape Breton “Men of the Deeps”, ishin vetëm disa nga pjesëmarrësit në koncertin me të cilin Redgrave u rikthye në Kosovë, gati një vit pasi kosovarët do t’i vizitonte në kampe refugjatësh në Maqedoni.
“The Return” i Sochut u dha premierë të mërkurën në kuadër të edicionit të tetë të “PriFilm Fest” i cili po mbahet në Prishtinë (b.an).
