Në një botim elegant në gjuhën angleze dhe me pjesëmarrjen e një disa prej intelektualëve më të njohur të rajonit tonë, ka nisur udhë revista kulturore online “The Bridge”, botim i Akademisë Balkanike Europiane.
Është kjo një nismë e një grupi publicistësh, akademikësh e autorësh të njohur në të gjithë rajonin tonë dhe më gjerë, për të promovuar njohjen, shkëmbimin e ideve, dialogun dhe rrëzimin e mureve të paragjykimit që ndajnë sot vendet e kësaj pjese të kontinentit.
Revista drejtohet nga shkrimtari dhe publicisti i njohur Bashkim Shehu dhe do të dalë një herë në dy muaj. Në numrin e parë (i cili publikohet në adresën www.bridge-magazine.net), do të gjeni intervista, shkrime, esse dhe galeri fotosh e pikturash nga autorë të njohur si Jordan Plevnes, Amila Kahroviç, Edi Hila, Vladimir Arsenijeviç, Ana Blandiana, Alek Popov, Gonca Ozmen, Doruntina Basha, Thodoris Nikolau dhe Miodrag Xhuriç.
