Richard Grenell ka uruar Kosovën në ditën e saj të Pavarësisë, duke shprehur edhe dëshirën që në festë të ishte i pranishëm edhe Hashim Thaçi, i cili ndodhet në paraburgim në Hagë, i akuzuar për krime lufte, shkruan A2 CNN.
“I uroj miqve të mi në Kosovë festime të lumtura dhe të sigurta në përvjetorin e 17-të Pavarësisë së tyre. Sidoqoftë, ky përvjetor errësohet nga një padrejtësi e madhe. Babai themelues i shtetit të Kosovës, Presidenti Hashim Thaçi, duhet të ishte duke festuar sot në Prishtinë, jo pas hekurave në Hagë”, shkruan Grenell në një postim në platformën X.
“Europianët kanë dështuar të veprojnë ndaj kësaj padrejtësie për 5 vitet e kaluara. Dhe institucionet e shtetit të Kosovës kanë dështuar të marrin hapat e nevojshëm ligjorë që kjo padrejtësi të marrë fund, për shkak të politikës. Kjo burgosje e padrejtë duhet të marrë fund”.
Një javë më parë, Presidenti Donald Trump e emëroi Richard Grenellin si Drejtor Ekzekutiv të Përkohshëm të Qendrës për Artet Skenike John F. Kennedy në Uashington, shkruan A2 CNN. Ky vendim pason shpalljen e Trump-it se ai do të marrë rolin e kryetarit të bordit të Qendrës Kennedy, duke shkarkuar disa anëtarë të bordit aktual, përfshirë kryetarin David Rubenstein.
Grenell, një aleat i ngushtë i Trump-it, ka shërbyer më parë si ambasador i SHBA-së në Gjermani dhe si Drejtor i Përkohshëm i Inteligjencës Kombëtare. Së fundmi, ai ishte i dërguari i posaçëm i Trump-it për misione speciale, duke përfshirë negociatat për lirimin e gjashtë amerikanëve të ndaluar në Venezuelë.
Qendra Kennedy, e cila merr financim shtetëror, është një nga institucionet kryesore të artit në SHBA dhe ka pasur prej kohësh mbështetje dypartiake. Ndryshimet e fundit në udhëheqjen e saj kanë ngjallur diskutime mbi politizimin e mundshëm të institucioneve kulturore.
Para zgjedhjeve në Kosovë, Grenell sulmoi disa herë Kryeministrin Albin Kurti, duke e quajtur jo të besueshëm. Pas kësaj deklarate, ai u përfshi në një debat në distancë me Kurtin.
