Zyrtarë të EULEX-it kanë bastisur banesat e ish-Presidentit Hashim Thaçi dhe kryetarit të PDK-së, Kadri Veseli një ditë pasi ata udhëtuan drejt Hagës.
Makinat e EULEX dhe të Policisë së Kosovës u raportuan jashtë shtëpisë së Thaçit. Klan Kosova raportoi se në shtëpinë e Thaçit ka mbërritur edhe deputeti Abelard Tahiri, i cili ka qenë këshilltar i ish-Presidentit.
Mediat kosovare raportojnë se EULEX ka hyrë edhe në ambientet e selisë së Partisë Demokratike të Kosovës. Megjithatë, zyrtarë të kësaj partie nuk janë përgjigjur për mediat në lidhje me bastisjen.
Kjo lëvizje vjen një ditë pas konfirmimit të aktakuzës për krime lufte ndaj Thaçit, Veselit, Selimit dhe Krasniqit. Më 5 nëntor, Thaçi, Veseli, Krasniqi dhe Selimi u transferuan në qendrën e paraburgimit të Dhomave të Specializuara me seli në Hagë. Ndërkaq, Krasniqi u transferua atje një ditë më parë, më 4 nëntor.
/a.r
