Një ditë më parë ish-nënkryetari i Partisë së Lirisë, Endrit Braimllari deklaroi se ishte i gatshëm të bashkëpunonte me Partinë Socialiste, pasi u përjashtua nga PL në kohën kur Ilir Meta ishte ende pa masën e arrestit nga SPAK.
“Zgjedhjet e ardhshme Parlamentare nëse do te krijohen hapësirat e nevojshme do të preferoja te kontribuoja ne nje force te majte si Partia Socialiste. Angazhimin ne këto vite ne politik e shoh si një mundësi për te mbështetur qytetaret”, tha Braimllari.
Por deklarata e Endrit Braimllarit u shoqërua me një sulm të ashpër nga Partia e Lirisë, duke e cilësuar këtë të fundit si “sufllaqexhi” dhe tradhtar që i kishte premtuar besnikëri Ilir Metës, ndërkohë që tashme po shkonte me Rilindjen.
“I kapur peng për shkak të firmave dhe veprimeve të papërgjegjshme, të parregullta dhe të pamoralshme, dhe tanimë i korruptuar deri në fyt, ky “sufllaqexhi” ordiner nga “zëri i qytetarëve” është kthyer në “një kërmill lëpirës”, në pritje për t’u kthyer në një përfitues të rëndomtë të zhvatjes së taksave të qytetarëve, a thua se “Rilindjes” nuk i mjaftojnë “sufllaqexhinjtë” e saj.
Nga një “besnik i jashtëzakonshëm” i Ilir Metës, Endrit sufllaqja tanimë është konvertuar edhe në një diversionit të ndyrë të SPAK-ut dhe të regjimit, që në bashkëpunim me të tjerë, prej një viti ka punuar kundër Partisë së Lirisë, i keqpërdorur në ekstrem nga “Rilindja” dhe Altin Dumani, siç po e dëshmon edhe vetë me zë e figurë”- thuhet ne reagimin e PL.
Duket se kunjat në distancë nuk kanë munguar as ditën e sotme. Ku Sekretari i Përgjithshëm i Partisë së Lirisë, Tedi Blushi ka postuar një fotografi me kushëririn e ish-nënkryetarit të PL, duke e cilësuar këtë të fundit si “Super Braimllari jonë”!
“Me Super Braimllarin tonë!! Edhe100 Pranvera të reja për Elisedin, një nga drejtuesit e mrekullueshëm të forumit rinor!
Mirënjohje për punën e palodhur për zgjerimin e pandalshëm të Partisë së Lirisë dhe në veçanti për integritetin dhe vlerat e larta morale që ka dëshmuar në vite, për qëndresën, sakrificat dhe luftën e pakompromis në përballje me Narkoregjimin dhe veglat e tij. Shumë urime dhe me Fitore“, shkruan Tedi Blushi.
