Tezja e dy vajzave të goditura me thikë nga babai i tyre thotë se ai ka qenë gjithmonë person problematik që grindej me të gjithë. Njëra nga vajzat, 17 vjeç, vdiq nga plagët e marra, ndërsa tjetra, 23 vjeç, e cila u fut për të shpëtuar motrën, është jashtë çdo rreziku për jetën. Tezja thotë për Gazetën Shqiptare se motra e saj kishte lejuar që burri i divorcuar të qëndronte në të njëjtën godinë me to për shkak se nuk kishte ku të shkonte tjetër dhe se nuk donte që vajzat të rriteshin pa baba.
“Ai sherrin e ka pasur me të gjithë. Pikërisht për këtë gjë u nda edhe motra ime. Motra ime ka pasur edhe më parë sherr me burrin e saj. Ai pinte gati çdo ditë dhe në punë nuk shkonte. Nuk ka punuar asnjë ditë të vetme dhe shkak i konflikteve të tyre ka qenë gjendja e vështirë ekonomike. Kujtimi nuk bënte asnjë punë. Pinte gjithë ditën. Që prej 24 vitesh që ai ka ardhur dhëndër në familjen tonë, nuk mbaj mend të ketë punuar qoftë edhe një ditë të vetme. Kurse motra ime ishte në punë si pastruese, dhe me një rrogë rreth 200 mijë lekë të vjetra mbante gjithë shtëpinë”, thotë motra e gruas së divorcuar.
