Teuta ka fituar ndaj Kukësit me rezultatin 2-1, në ndeshjen e vlefshme për javën 22 të Superligës. Me fitoren e sotme, Teuta shkon në kuotën e 39 pikëve në renditje, duke i marrë vendin e dytë Kukësit, që mbetet me 38 pikë në vendin e tretë.
Një ndeshje spektakolare, me të dyja skuadrat që dhuruan emocione deri në fund. Por fati i buzëqeshi Teutës, që arriti një përmbysje spektakolare, dhe ngjitet kështu në një pozicion edhe më të sigurtë për Kupat e Europës.
Sfida ka nisur me grintë nga të dyja skuadrat, të cilat hidhen në sulm që në minutat e para, teksa Progni përpiqet të nxjerrë skuadrën e tij para. Ndërkohë nga ana tjetër, skuadra e trajnerit Armando Cungu, që në këtë takim uli në stol Shkurtajn dhe riktheu titullar Reginaldon, rrezikon pikërisht me këtë të fundit.
Kështu goli i avantazhit në pjesën e parë për Kukësin, do të vinte në minutën e 31` të takimit, kur Reginaldo jashtë zone realizon një gol spektakolar. Një top i goditur nga Rumbullaku kthehet pas nga mbrojtja kuksiane dhe gjen Reginaldon, që gjuan fuqishëm dhe shtang skuadrën e Teutës. Megjitahtë, durrsakët nuk dorëzohen dhe kërkojnë të barazojnë, por në 45 minutat e para nuk arrijnë.
Me rinisjen e pjesës së dytë, Teuta kërkon të vendosë barazpeshën, teksa skuadra e Shkëmbit sulmon vazhdimisht. Skuadra kuksiane vihet në vështirësi disa herë nga sulmi vendas, por mbrojtja e verilindorëve bën gjithçka mirë, duke mbyllur çdo hapësirë të rrezikshme.
Por nëse nga aksioni nuk do gjendej hapësirë, Gerhard Progni, do të mendonte të gjente golin e barazimit në minutën e 69`, duke realizuar një gol të spektakolar nga goditja e dënimit.
Dy minuta më von vjen dhe përmbysja spektakolare e Teutës, që shënon me Renato Arapin, i cili gjen golin e parë me Teutën. Një tjetër goditje dënimi, sërish Progni që godet, topi shkon në zonë, aty ku mes rrëmujës përfundon në këmbët e Arapit që shtyn drejt rrjetës dhe 2-1 për Teutën.
Skuadra e Armando Cungut ka humbur një mundësi të shkëlqyer në shtesë, teksa Isli Hidi ka pritur një penallti të gjuajtur nga Uilliam Cordero, me 11 metërshin e shkaktuar nga Tefik Osmani, që la dhe ekipin me një lojtar më pak në fund pasi doli me të kuq.
Minutat e mbetura të ndeshjes nuk sjellin asnjë ndryshim në rezultat, me Teutën që arrin të ruajë fitoren deri në fund. Kështu skuadra durrsake do të presë e qetë sfidën e radhës, atë ndaj Luftëtarit, ndërsa Kukësi do të përballet me Kamzën.
FORMACIONET
Teuta: Hidi, Frashëri, Osmani, Arapi, Hakaj, Sidibe, Progni, Kallaku, Traore, Kamara, Bushiç.
Trajner: Bledi Shkëmbi
Kukësi: Frashëri, Maliqi, Cuculi, Shameti, Rrumbullaku, Dzaria, Limaj, Rroca, Et’hemi, Kordeiro, Rexhinaldo.
Trajner: Armando Cungu
Gjyqtarë: Juxhin Xhaja
/telesport/a.r
