Natën e të hënës, ndotja e ajrit në qytetin e Tetovës ka arritur shifra rekorde, ndërsa shoqëria civile dhe shumë qytetarë bën thirrje për bojkot të mësimit, njofton korrespodenti i “Koha Ditore” nga Shkupi.
Gjatë orëve të mesnatës, grimcat PM10 kanë arritur 996 mikrogram për metër kub apo 20 herë më shumë se limiti i lejuar. Ndërsa të martën në orët e mëngjesit, disa nga prindërit u paraqitën para objekteve shkollore pa fëmijët e tyre. Bojkoti i mësimit erdhi pas thirrjeve të shoqërisë civile. Një nga drejtuesit e Shoqatës “EcoGuerrila” ka bërë thirrje që të mos dërgohen të martën fëmijët në shkolla.
“Unë nesër nuk e dërgoj djalin tim në shkollë, në vend të tij do shkoj unë. Ju bëj ftesë dhe prindërve të tjerë që kanë fëmijët në shkollën “LIRIA” që nesër në ora 13:00 të vijnë para shkollës pa fëmijët dhe të takohemi me autoritetet e shkollës. Është për shëndetin e fëmijëve tanë! Presim nga komuna shpalljen e gjendjes së jashtëzakonshme”, ka shkruar Arianit Xhaferi, një nga drejtuesit e EcoGuerilla, në profilin e tij në Facebook.
Thirrje të njëjtë ka bërë edhe Lëvizja “Nëna dhe fëmija”. Si ndotës kryesor të ajrit, ekspertët dhe Instituti i shëndetësisë kanë identifikuar fabrikën “Jugohrom”.
