Testimi fizik i aplikantëve që konkurrojnë për Shkollën Bazë të Policisë, i cili filloi dje, do të vijojë deri më datë 7 prill 2016, shkruan Gazeta Shqiptare. Çdo ditë do t’i nënshtrohen testimit 2 grupe aplikantësh të cilët kanë kaluar me sukses fazën e parë të testimit me shkrim. Testimi fizik po zhvillohet në stadiumin “Qemal Stafa”, ku aplikantët duhet të paraqiten me uniformë sportive, kartë identiteti dhe fletën e pranimit në ditën dhe orën e përcaktuar. Ky lloj testimi është duke u kryer në dy grupe. Grupi i parë fillon në orën 07:00, ndërsa grupi i dytë në orën 13:00. Kështu, Policia e Shtetit dje bëri publike edhe datat se kur do të testohen aplikantët e tjerë.
Sot, më 31 mars dhe 1 prill do t’i nënshtrohen testimit fizik aplikantët e Qarkut Tiranë, grupi i parë në orën 07:00 dhe grupi i dytë në orën 13:00. Më datë 1 prill do t’i nënshtrohen testimit fizik aplikantët e Qarkut Kukës, Durrës dhe Elbasan, grupi i parë në orën 07:00 dhe grupi i dytë në orën 13:00. Më datë 2 prill do t’i nënshtrohen testimit fizik aplikantët e Qarkut Elbasan (pjesa e dytë) dhe Berat, grupi i parë në orën 07:00 dhe grupi i dytë në orën 13:00. Më datë 3 prill do t’i nënshtrohen testimit fizik aplikantët e Qarkut Berat (pjesa e dytë) dhe Fier, grupi i parë në orën 07:00 dhe grupi i dytë në orën 13:00. Më 4 prill do t’i nënshtrohen testimit fizik aplikantët e Qarkut Fier (pjesa e dytë), Lezhë dhe Shkodër, grupi i parë në orën 07:00 dhe grupi i dytë në orën 13:00. Më datë 5 prill do t’i nënshtrohen testimit fizik aplikantët e Qarkut Shkodër (pjesa e dytë), Korçë dhe Gjirokastër, grupi i parë në orën 07:00 dhe grupi i dytë në orën 13:00.
Më 6 prill do t’i nënshtrohen testimit fizik aplikantët e Qarkut Gjirokastër (pjesa e dytë) dhe Vlorë, grupi i parë në orën 07:00 dhe grupi i dytë në orën 15:00. Më 7 prill do t’i nënshtrohen testimit fizik aplikantët e Qarkut Vlorë (pjesa e dytë), Dibër dhe Durrës, grupi i parë në orën 07:00 dhe grupi i dytë në orën 13:00. Ndërkohë, emrat e secilit prej aplikantëve janë të afishuara në faqen zyrtare të Policisë së Shtetit, ku është përcaktuar edhe grupi në të cilin aplikanti do të testohet.
PIKËT
Më herët, policia raportoi se kandidatët do të quhen kalues në këtë fazë nëse marrin të paktën 60% të pikëve të testimit. “Aplikantët që kalojnë testin me shkrim, duhet të kalojnë testin e aftësive fizike, që teston aftësitë psikomotore, si: shpejtësia, shkathtësia fizike, rezistenca, forca muskulore, koordinimi fizik, të domosdoshme për punën e punonjësit të Policisë”, tha zyrtarisht policia. Testi i aftësive fizike do të vlerësohet sipas standardit të përcaktuar në kohën e zhvillimit të testit. Ky provim përbëhet nga pesë komponentë, të cilët janë: kërcim vertikal, ushtrime për barkun 1 minutë, maksimumi i mundshëm pompash, vrap 300 metra, ecje/ kros 2.4 km.
Ndërkohë, mësohet se normat për kalimin e këtij testi janë të ndara veç për femrat dhe për meshkujt, dhe sipas grupmoshave. Aplikanti duhet të marrë minimumin e mundshëm të pikëve për të vazhduar fazat e tjera të konkurrimit. Në testimin me shkrim, nga 5.012 aplikantë, u shpallën fitues vetëm 1.905 persona. Ndërsa, në përfundim të të gjithë procesit të konkurrimit, do të përzgjidhen 300 kandidatë fitues, të cilët do të vazhdojnë Shkollën Bazë të Policisë. Nga personat fitues, 90 kandidatë do të jenë për gjininë më pak të përfaqësuar dhe 6 persona për minoritetet.
