Në fjalimin e shumëpritur nga kryeqyteti i Polonisë Varshavë, Presidenti amerikan Donald Trump pritet të argumentojë se sot është në loje e ardhmja e vetë civilizimit perëndimor.
Duke e sjellë Poloninë si shembullin e vendit të gatshëm për mbrojtjen e qytetërimit, Trump, nga sa ka mësuar shtypi i huaj, do të paralajmërojë mbi kërcënimet e “terrorizmit dhe ekstremizmit”.
Te qeveria konservatore polake, mbështetëse e këndvështrimit të tij të ashpër mbi emigracionin dhe sensit të fuqishëm të sovranitetit, presidenti amerikan ka gjetur një aleat të mirë. Siç na kujton eksperienca e Polonisë, pritet të thotë kreu i Shtëpisë së Bardhë, mbrojtja e perëndimit varet jo vetëm nga mjetet, por edhe nga vullneti i popujve të tij për të triumfuar.
Pyetja themelore e kohës sonë është a e ka perëndimi vullnetin për mbijetesë? Ndalesa e Trump në Poloni vjen përpara samitit të G20-s në Hamburg të Gjermanisë, një qytet tashmë i blinduar për mbërritjen e liderëve botërorë e ku mijëra vetë pritet të protestojnë gjatë ditës.
Përplasjet e dhunshme janë paralajmëruar tashmë. Policia ka konfiskuar deri tani një sërë armësh të prodhimit artizanal.
Në fjalimin e tij nga monumenti i ngritur në sheshin Krasinski në kujtese të kryengritjes së 1944 në Varshavë, presidenti i Shteteve të Bashkuara do të rikonfirmojë gjithashtu mbështetjen e Amerikës për Europën Lindore, duke e hedhur një hap të tillë përpara se të takojë për herë të parë personalisht me shefin e Kremlinit, Vladimir Putin në Hamburg.
Pikëpyetja e madhe që rrethon samitin e G20-s është se sa fort do t’i meshojë Trump angazhimit të Uashingtonit për mbrojtjen e ndërsjellët të NATO-s, organizmi të cilin jo shumë kohë më parë e përshkruante si të vjetërsuar dhe i fshikulloi vendet anëtare për faktin që nuk shpenzojnë më shumë në këtë drejtim.
a.ç
