Një tërmet i ri me magnitudë 5 ballë të shkallës Rihter është regjistruar sot (24 prill) në zonën detare të Lassithit, në Kretë, vetëm disa orë pas lëkundjes së fortë 5.7 ballë që u ndje në orët e para të mëngjesit.
Sipas të dhënave sizmologjike, epiqendra e tërmetit të fundit ishte rreth 18 kilometra në jug të Goudouras, ndërsa thellësia fokale u regjistrua në rreth 7.7 kilometra. Lëkundja është ndjerë në disa zona të ishullit, përfshirë edhe Heraklionin, duke shkaktuar shqetësim te banorët dhe turistët.
Që nga mëngjesi i së premtes, rajoni i Kretës ka përjetuar një seri lëkundjesh sizmike, përfshirë një tërmet 5.7 ballë në orën 06:17 dhe disa pasgoditje të tjera me magnitudë 4.2 dhe 4 ballë.
Pavarësisht aktivitetit të shtuar sizmik, ekspertët theksojnë se situata është e pritshme. Sizmologu Costas Papazachos deklaroi se tërmeti i fundit i fortë përbën një pasgoditje dhe nuk është një fenomen i papritur.
“Është një sekuencë e pasur pasgoditjesh dhe magnituda 5 ballë nuk është e papritur. Mund të ndodhin edhe lëkundje të tjera, madje edhe më të forta”, u shpreh ai.
Sipas tij, rreth 75% e pasgoditjeve ndodhin gjatë javës së parë, ndërsa aktiviteti sizmik mund të vazhdojë për një periudhë më të gjatë kohe, duke qenë më i zgjatur sesa perceptohet nga publiku.
Autoritetet sizmologjike po vijojnë monitorimin e situatës, ndërsa deri tani nuk raportohet për dëme të mëdha materiale apo të lënduar.
