Një 24-vjeçar U.Ll., ka rënë në prangat e policisë në Cërrik pasi dyshohet se ka tentuar të vrasë me thikë 37-vjeçarin S.Rr., gjithashtu po procedohet gjendje të lirë i plagosuri.
Burimet policore bëjnë me dije se shkaku i ngjarjes është për motive të dobëta pas një konflikti të çastit në fshatin Gjyralë.
37-vjeçari është dërguar i plagosur në spital dhe është jashtë rrezikut për jetën.
Policia ka sekuestruar thikën me të cilën u plagos S.Rr. dhe një shkop bejsbolli që ky i fundit kishte në automjetin e tij.
“Menjëherë pas njoftimit për një plagosje me mjet prerës, në fshatin Gjyralë, shërbimet e Komisariatit të Policisë Cërrik kanë organizuar punën dhe kanë shkuar në vendngjarje, për të kapur autorin dhe për të sqaruar rrethanat e rastit.
Si rezultat i ndërhyrjes së shpejtë dhe veprimeve policore profesionale, u kap dhe u vu në pranga, menjëherë pas ngjarjes, autori i dyshuar i rastit, shtetasi U. Ll., 24 vjeç, banues në Cërrik. Ai dyshohet se gjatë një konflikti të çastit, për motive të dobëta, ka tentuar të vrasë me mjet prerës (thikë), shtetasin S. Rr., 37 vjeç. I plagosuri është aktualisht në kujdesin e mjekëve dhe jashtë rrezikut për jetën”, njofton policia.
