SHBA planifikon të rikthejë një bazë ushtarake të epokës së Luftës së Ftohtë në jug të Groenlandës dhe të krijojë një tjetër në bregun lindor të ishullit, sipas tre personave në dijeni të marrëveshjes.
Dy objektet janë Narsarsuaq, ku dikur ndodhej baza amerikane Bluie West One, dhe Mestersvig, një post ushtarak që aktualisht përdoret nga Patrulla Sirius, një njësi speciale daneze që kryen patrullime me sajë qensh.
Marrëveshja mes SHBA-së, Danimarkës dhe Groenlandës pritet të nënshkruhet këtë të martë (22 shtator) në Asamblenë e Përgjithshme të OKB-së në Nju Jork. Teksti i plotë i marrëveshjes nuk është bërë ende publik. Gjatë Luftës së Ftohtë, SHBA-ja kishte 17 instalime ushtarake dhe mbi 10 mijë trupa në Groenlandë. Aktualisht, baza amerikane Pituffik Space Base është i vetmi instalim i përhershëm amerikan, me rreth 150 personel ushtarak.
Marrëveshja vjen pas muajsh presioni nga presidenti amerikan Donald Trump, i cili ka deklaruar vazhdimisht se dëshiron që SHBA-ja të marrë kontrollin e Grenlandës. Këto qëndrime shkaktuan tensione diplomatike mes SHBA-së, Danimarkës dhe Groenlandës dhe nxitën negociata për sigurinë në Arktik.
Danimarka thotë se marrëveshja e re do ta vendosë sigurinë në Arktik brenda kuadrit të NATO-s, në vend që ajo të trajtohet vetëm nga SHBA-ja dhe Danimarka.
