Me kryetarin e zgjedhur pas votimeve të 14 majit në paraburgim, anëtarët e Këshillit Bashkiak të Himarës kanë nisur mbledhjen për konstituimin e këtij këshilli.
Mbledhja, ashtu sikurse pritej ka nisur me debate dhe pakënaqësi mes përkrahësve të Fredi Belerit dhe anëtarëve të tjerë të këshillit si dhe punonjësve të bashkisë. Mes këtyre debateve, anëtarët e këshillit kanë nisur procedurën e betimit, ndërsa mbetet ende e paqartë se si do të procedohet me betimin e kryetarit në mungesë, Fredi Belerit.
Ndërkohë, Dhimitër Kapaj nga Partia Socialiste, është zgjedhur kryetar i Këshillit Bashkiak.
Sipas procedurës, nëse Beleri nuk bën betimin ai nuk mund të marrë detyrën. Ndërsa mbështetësit e tij kanë shkruar pankarta me kërkesë për lirimin e të zgjedhurit të tyre nga paraburgimi ku mbahet.
Nga ana tjetër, Gjykata e Posaçme nuk ka pranuar kërkesat e Fredi Belerit që të marrë pjesë në mbledhjen e konstituimit të Këshillit për të bërë betimin. Fredi Beleri i u arrestua dy ditë para zgjedhjeve të 14 majit, i dyshuar për korrupsion në zgjedhje me shit-blerjen e votave.
/a.r
