Telekom Albania dhuron 20 tableta për fëmijët e shtruar në pavionin e Onko-Hematologjisë. Këto pajisje teknologjike do t’u shërbejnë fëmijëve të ndjekin programet mësimore si të gjithë bashkëmoshatarët e tyre. Telekom Albania ka bërë të mundur pajisjen e tabletave me një programin, i cili përmban njohuritë shkollore themelore të shkollës 9-vjeçare për grupmoshat 5-16 vjeç.
Në programin e instaluar nga Telekom Albania, mësimet janë të ndara sipas viteve, lëndëve dhe temave duke marrë për model sistemin arsimor të Republikës së Shqipërisë. Lëndët shpjegohen në shqip nga mësues të regjistruar dhe shoqërohen të sinkronizuara me video shkencore, filma, imazhe, dokumente, harta specifike, duke shtjelluar, thelluar, dhe përditësuar të gjitha temat mësimore të renditura sipas programit.
Nga ana tjetër, Telekom Albania ka kontribuuar edhe për pajisjen me libra enciklopedikë dhe formues të pavionit, në mënyrë që fëmijët të kalojnë kohën e lirë duke mësuar dhe zbuluar më tepër kuriozitete.
“Sot është dita e parë e shkollës dhe në fakt të gjithë fëmijët që janë këtu do të donin të ishin në shkollë, ndaj ne menduam që duke kërkuar pak ndihmë mund ta sjellim shkollën te fëmijët. Për këtë iniciativë na mbështeti shumë fort Telekom Albania, duke i mundësuar fëmijëve që të kenë afër shkollën dhe dijen, edhe pse janë në kushte që kanë nevojë për shërbim intensiv shëndetësor. Në të vërtetë këto lloj projektesh vijnë ngaqë ne kemi një staf të përkushtuar mjekësor dhe kemi një objektiv të qartë administrues për ta vendosur pediatrinë në qendër të vëmendjes. Falënderoj posaçërisht Telekom Albania që është një operator ekonomik që e ka rritur në një shkallë shumë të lartë përgjegjësinë sociale për të ndihmuar sa herë që ka nevojë për diçka novatore në shërbimin shëndetësor në Shqipëri”, u shpreh znj. Milva Ekonomi, zv/ministre e Shëndetësisë.
“Në fakt ,ideja na ka lindur pak kohë më parë, sigurisht pas kërkesës së Ministrisë së Shëndetësisë, por kemi marrë një letër nga vetë fëmijët, nga një fëmijë që ka qenë i shtruar në spital, i cili në fillim të vitit shkollor na dërgoi një letër ku kërkonte të kishte më shumë akses për dije nëpërmjet teknologjisë. Kështu na lindi ideja, duke pasur parasysh që këta fëmijë kalojnë orë të tëra, ditë, net dhe vite në këtë pavijon dhe largohen nga klasat, nga shokët, nga mësimdhënia, ndaj na u duk e domosdoshme të krijonim këtë projekt, duke pasur parasysh që Telekom Albania ka mundësi të mëdha në fushën e teknologjisë” – tha Ornela Bego, Menaxhere e Marrëdhënieve të Korporatës në Telekom Albania.
Dr. Anila Godo, shefe e shërbimit në këtë repart shprehu falënderimet për këtë mënyrë novatore dhe dëfryese për edukimin e këtyre fëmijëve. “Është veçanërisht e rëndësishme, jo vetëm që këta fëmijë të mos shkëputen nga edukimi i tyre por edhe për faktin që, është e rëndësishme të kemi pacientë të qetë dhe të integruar në jetën sociale, ne të jemi sa më të efektshëm me terapinë tonë”, tha dr. Godo.
“Kjo është një ëndërr e fëmijëve e bërë realitet ndaj falënderojmë kontributin e Telekom Albania dhe besoj se këto nisma solidare dhe humane vlejnë shumë për të shtuar shërbimet tona dhe sociale në ato shëndetësore”, u shpreh në takim drejtoresha e QSUT-së, Ogerta Manastirliu.
Telekom Albania e konsideron mirëqenien e fëmijëve dhe shëndetin në përgjithësi si një nga shtyllat e përgjegjësisë së saj sociale, e konkretizuar me nisma të vazhdueshme në dobi të institucioneve të ndryshme shëndetësore në vend. Kjo nuk është hera e parë që Telekom Albania jep kontributin e vet në ndihmë të fëmijëve. Në të shkuarën kompania ka dhuruar për Spitalin Pediatrik në Tiranë aparaturën e ekokardiografisë për kontrollin e shëndetit të zemrës tek fëmijët. Gjithashtu, Telekom Albania ka kontribuar në rikonstruksionin dhe sistemimin e disa prej ambienteve të urgjencës së këtij spitali i mundësuar prej punës vullnetare të punonjësve të kompanisë, gjelbërimin e ambienteve përreth si dhe fushata të ndryshme në përmirësim të cilësisë së jetës.
Telekom Albania, si pjesë e gjigantit Deutsche Telekom, do të vazhdojë të mbështesë në mënyrë të vazhdueshme institucionet publike, duke ndikuar në përmirësimin e kushteve të shërbimit publik.
