Këngëtarja Britney Spears u akuzua në Kaliforni të enjten, më 30 prill për drejtim mjeti nën ndikimin e drogës dhe alkoolit.
Sipas prokurorit, Spears u akuzua për një shkelje të vetme, atë të drejtimit të mjetit nën ndikimin e kombinuar të alkoolit dhe të paktën një droge, megjithatë padia penale nuk specifikon se çfarë lloj alkooli ose droge, ose çfarë sasie akuzohet se ka përdorur këngëtarja.
Sipas një artikulli të CNN, seanca gjyqësore kundër Spears është caktuar për të hënën, më 4 maj dhe prokurorët kanë bërë të ditur se meqenëse është një akuzë për kundërvajtje, ajo nuk do të jetë e detyruar të paraqitet në gjykatë, thanë prokurorët.
Në gjykatë të hënën, këngëtares do t’i ofrohet ajo që njihet zakonisht si një “wet reckless”, duke i lejuar të pandehurit të pranojë fajësinë dhe të marrë 12 muaj provë, t’i njihet çdo kohë e vuajtur më parë, të ndjekë një kurs të detyrueshëm për drejtimin nën ndikimin e alkoolit, si dhe të paguajë gjoba dhe tarifa të detyruara nga shteti.
Oferta është e zakonshme veçanërisht për të pandehurit që kanë treguar në mënyrë të pavarur motivim për të adresuar problemet e tyre dhe për të kërkuar trajtim.
Spears u bë në qendër të vëmendjes së tabloideve në fillim të viteve 2000 dhe një burim vëmendjeje publike, ndërsa luftonte me sëmundje mendore dhe paparacët dokumentonin detajet e jetës së saj private.
Në vitin 2008, Britney Spears u vu nën një kujdestari të urdhëruar nga gjykata , të drejtuar kryesisht nga babai i saj dhe avokatët e tij, që do të kontrollonte vendimet e saj personale dhe financiare për më shumë se një dekadë. Ajo u çlirua nga kujdestaria në vitin 2021.
Dikur fenomeni i muzikës pop për adoleshentë dhe ish-anëtarja e “Mickey Mouse Club” u bë një superyll i muzikës ndërkombëtare gjatë viteve 1990 dhe 2000 me hite si “Toxic”, “Gimme More” dhe “I’m a Slave 4 U”.
