Statistikat për 3-mujorin e fundit të vitit 2025 tregojnë një ndryshim të qartë në tregun e punës në Shqipëri. Punësimi ka rënë në disa sektorë, veçanërisht në zyrat dhe në industri, ndërsa është rritur në sektorë si turizmi dhe ndërtimi.
Sipas të dhënave të INSTAT, një nga rëniet më të mëdha është regjistruar në aktivitetet mbështetëse të biznesit, si administrimi i zyrave, ku punësimi ka rënë me 7.3%. Ky sektor shihet si një tregues i rëndësishëm i shëndetit të ekonomisë, pasi rënia e tij tregon ulje të kërkesës për shërbime nga bizneset e tjera.
Një arsye e përmendur për këtë rënie është edhe automatizimi dhe përdorimi i inteligjencës artificiale, të cilat po zëvendësojnë disa detyra të përsëritura si faturimi dhe menaxhimi i të dhënave, duke ulur nevojën për staf mbështetës.
Rënie është vënë re edhe në sektorë të tjerë, si transporti dhe magazinimi, si dhe në industrinë përpunuese dhe nxjerrëse, të cilat po përballen me vështirësi për shkak të uljes së porosive nga jashtë, rritjes së kostove dhe ndikimit të kursit të këmbimit. Edhe aktivitetet ligjore kanë shënuar një rënie të lehtë të punësimit.
Në anën tjetër, disa sektorë po rriten ndjeshëm dhe po krijojnë vende të reja pune. Turizmi është një nga motorët kryesorë të rritjes, me hotelet që kryesojnë me rritje të punësimit. Edhe tregtia me shumicë po rritet, ndërsa ndërtimi dhe agjencitë e udhëtimit tregojnë gjithashtu rritje të qëndrueshme.
Në përgjithësi, këto të dhëna tregojnë një zhvendosje të punësimit nga sektorët tradicionalë dhe të industrisë drejt sektorëve të shërbimeve, sidomos turizmit, duke reflektuar ndryshimet në strukturën e ekonomisë në fund të vitit 2025./Marrë nga Monitor
