Qëndrimi për një kohë të gjatë para tabletave dhe telefonave po dëmton sytë e fëmijëve të vegjël.
Të dhënat e depistimit për fëmijët në parashkollor dhe ata të klasave të para tregojnë se një në pesë fëmijë ka probleme me shikimin.
“Ne vumë re që 15% – 20% e fëmijëve që kalonim nëpër duar në vizitën oftamologjike të syve, disa fëmijë çedonin. Çedimi ishte se nuk shihnin mirë me një sy fare, mund të ketë problematika të të dy syve”, tha Rezarta Shkurta, okuliste.
Problemet më të shpeshta janë syri i thatë dhe miopia.
“Përqindja më e lartë e fëmijëve ka rezultuar me syrin e thatë, i irrituar, i skuqur, pa shkëlqim… Njëri sy i tyre nuk shikonte mirë. Kishte numër… kishin filluar të bëheshin miopë. Pra, duke mbajtur objektet afër për të lexuar dhe për të parë, ky fëmijë nuk mund të shikojë larg”, shtoi më tej okulistja.
Okulistët rekomandojnë shmangien e përdorimit të tabletave dhe telefonave tek fëmijët e vegjël, ndërsa në rastet kur evidentohen problematikat, duhet të ndiqen nga mjekët specialistë dhe të përdorin syze.
