Ditën e sotme, Gjykata e Tiranës ka vendosur masën e sigurisë me burg për një shpërndarës picash, I cili u arrestua shtatorin e kaluar pasi, ngacmonte e përndiqte një gjimnaziste. Ndaj shtetasit Klauden M, është vënë masa e sigurisë “arrest me Burg”, prej 3 vjet e 8 muaj, për ngacmim.
Sipas vendimit të Gjykatës, që disponohet nga “Panorama”, Klauden M. u njoh me gjimnazisten pasi kjo e fundit kishte porositur një picë në picerinë ku ai punonte. Më pas, i riu, i cili rezultoi se ishte edhe përdorues i lëndëve narkotike, i ka kërkuar vajzës që të lidhej me të. Ajo nuk ka pranuar një gjë të tillë dhe aty nisi edhe përndjekja.
Klaudeni e kërcënonte vajzën se do ta vriste nëse ajo nuk lidhej me të. Madje, në një episod ai ka tentuar t’i futet me dhunë në shtëpi. Kanë qenë dy oficerë policie që kanë tentuar ta ndalin, por Klaudeni ka goditur njërin prej tyre në kokë, duke u larguar më pas nga vendngjarja. Por arratia e tij nuk zgjati shumë, pasi ai u arrestua nga Policia dhe u vu nën akuzë për “përndjekje”, “prodhim dhe shitje narkotikësh” dhe “kundërshtim me dhunë të forcave të rendit”.
NGJARJA
Sipas dosjes së Prokurorisë së Tiranës, gjimnazistja M.G. është përndjekur përreth një muaj nga i pandehuri. E dëmtuara ka shpjeguar në Prokurori se më të është njohur, teksa ka blerë një picë dhe pas kësaj ka kryer edhe një porosi tjetër. Klaudeni i ka thënë në porosinë e dytë se nuk i dëshironte paratë dhe ia kishte dhënë ato mbrapsht. Më pas, ai ka nisur të ndjekë gjimnazisten çdo ditë duke nisur edhe ta kërcënojë.
“Po nuk u bëre e imja, unë do të të vras”. Sipas vajzës, ai e telefononte çdo ditë dhe i kërkonte lidhje.
Kulmi arriti më 28.09.2017, kur rreth orës 15:00 i pandehuri ka telefonuar gjimnazisten, por kjo e fundit nuk i është përgjigjur. Më pas ai i ka dërguar një SMS që të hapte telefonin dhe e ka telefonuar duke i thënë: “Do të vijë tani te shtëpia dhe do të të vras, ty dhe mamanë tënde. Nuk dua t’ia di për burg dhe nuk e kam problem që të bëj përsëri. Kam tre vëllezërit që do të bëjnë keq ty dhe mamasë tënde. Nuk ke zgjidhje tjetër, o të marr ty o s’ka”.
Sipas dosjes, Klaudeni është ngjitur në banesën e gjimnazistes dhe në atë moment nëna e saj ka telefonuar Policinë. Në vendin e ngjarjes kanë mbërritur dy punonjës policie.
Njëri prej tyre ka kontaktuar me të dëmtuarën, ndërsa tjetri i ka zënë pritë të pandehurit te shkallët e pallatit. Mirëpo, Klauden M. e ka qëlluar punonjësin e policisë me një mjet të fortë në kokë dhe ka tentuar të largohet.
Por arratia e tij nuk ka zgjatur shumë, pasi është arrestuar nga Policia pak metra më tutje. Prokuroria konkludon se, si pasojë e veprimeve të tij gjimnazistja dhe nëna e saj janë ndier të kërcënuara dhe të përndjekura./Panorama.al
