Qysh kur u përhap pandemia e koronavirusit, pyetja të cilën shumë njerëz i kanë bërë vetes është, a mund të sëmuresh sërish pas një shërimi nga Covid?
Prej shumë javësh me dyshime pas konfirmimit të rasteve të riinfektimeve, nga Koreja e Jugut, një nga vendet e para të prekura nga Sars-CoV-2, pas Kinës, vjen një hipotezë e re.
Sipas një mjeku të spitalit universitar të Seulit, Oh Myoung-don, ekziston dyshimi se rastet e riinfektimeve, kanë të bëjnë me testet.
Kjo pasi sipas tij, testi kërkon grimcat e materialit gjenetik të virusit dhe nuk mund të dallojë fragmentet gjenetike të virusit që janë akoma aktive nga ato të virusit joaktive.
Deklarata e mjekut u bë gjatë një konference të mbajtur në spitalin ku ai punon, pasi javëve të fundit u raportuan më shumë se 260 raste riinfektimesh.
Në Korenë e Jugut janë raportuar 256 viktima qysh nga fillimi i epidemisë, si dhe 10.822 të infektuar.
/a.r
