Shërbimet britanike të sigurisë kanë zbuluar një rrjet të gjerë spiunësh rusë dhe njësi të inteligjencës ushtarake të përfshira në një fushatë disa-vjeçare sulmesh kibernetike, zjarrvëniesh dhe sabotimesh në Britani dhe në Evropë.
Në mesin e të sanksionuarve janë edhe agjentë që në vitin 2013 kishin vënë në shënjestër llogaritë e emailit të Yulia Skripal, vajza e ish-agjentit të dyfishtë Sergei Skripal — pesë vite para se të dy pothuajse vriteshin në sulmin famëkeq me agjent nervor në Salisbury. Në total, janë sanksionuar 18 oficerë të inteligjencës ushtarake ruse (GRU) dhe tre njësi të specializuara të këtij shërbimi.
Sekretari i Jashtëm britanik, David Lammy deklaroi se “spiunët e GRU-së po udhëheqin një fushatë për destabilizimin e Evropës, për të minuar sovranitetin e Ukrainës dhe për të rrezikuar sigurinë e qytetarëve britanikë”.
Ai shtoi se Rusia ka shënjestruar gjithashtu mediat, ofruesit e telekomunikacionit, infrastrukturën energjetike dhe institucionet politike e demokratike, sipas The Times.
Këtë muaj, tre persona u shpallën fajtorë për një sulm dhe zjarrvënie ndaj një biznesi në Londër të lidhur me Ukrainën, që sipas policisë ishte kryer me urdhër të grupit mercenar Wagner.
Ministria e Jashtme britanike tha se njësitë e sanksionuara të GRU-së kanë “aftësi të njohura kibernetike”.
Ato përfshijnë Njësinë 26165 dhe 74455, të cilat përfaqësojnë një kapacitet të avancuar për operacione kibernetike me qëllime ushtarake dhe politike, si dhe Njësinë 29155, e njohur si Qendra e Trajnimit Specialistik 161, që kryen operacione kundër Ukrainës, partnerëve evropianë dhe aleatëve të NATO-s.
Disa nga sulmet e dokumentuara përfshijnë:
Një sulm kibernetik ndaj qeverisë së Estonisë në vitin 2020;
Ndërhyrje në zgjedhjet presidenciale të Francës në vitin 2017;
Sulme ndaj Lojërave Olimpike të Parisit 2024;
Ndihmë për goditjet me raketa ndaj qytetit ukrainas Mariupol, përfshirë atë ndaj teatrit ku u vranë qindra civilë, përfshirë fëmijë.
Në Britani, Rusia akuzohet gjithashtu për ndërhyrje në institucionet demokratike, furnizimin me energji dhe sektorët e komunikimit.
Qendra Kombëtare për Sigurinë Kibernetike, pjesë e GCHQ-së, zbuloi gjithashtu se grupi APT28 (i njohur si “Fancy Bear”), pjesë e GRU-së, ka përdorur programe të reja të dëmshme për të spiunuar përmes llogarive të email-it të viktimave.
Moska i ka mohuar të gjitha akuzat, duke i cilësuar si të motivuara politikisht dhe duke pohuar se Rusia nuk përbën kërcënim për Britaninë.
