Të pakënaqur me procesin e brendshëm zgjedhor, afro 20 anëtarë të Lëvizjes Vetëvendosje, në Ferizaj, i janë bashkuar LDK-së.
Ish-nënkryetari i këtij subjekti, Flamur Istrefi, dhe dy aktivistët Bardhyl Abazi e Arben Isufi, të cilët janë ankuar se gjatë procesit zgjedhor brenda këtij subjekti janë anashkaluar pa ndonjë arsye, shkruan “Koha Ditore”.
“Kam qenë dy mandate nënkryetar i VV-së dhe një ndër aktivistët më të mirë, por dorëheqja ime dhe e dy kolegëve të mi nga ky subjekt ndërlidhjet me një varg pakënaqësish duke u nisur nga procesi i brendshëm zgjedhor, ndërkaq ajo më e rëndësishmja është që ky subjekt e ka eliminuar nga gara për kryetar Xhabir Morinën, të cilin e kemi përkrahur një pjesë e madhe e aktivistëve, pastaj moskoordinimi i qendrës së Prishtinës me Ferizajn për të gjitha angazhimet tona është arsyeja e dytë e dorëheqjes”, ka thënë për KD-në ish-nënkryetari i VV-së, Flamur Istrefi.
Ndërkohë, KD-ja nga burime të sigurta ka mësuar se Xhabir Morina tashmë ka aderuar në PDK. (b.an)
