Federata e Basketbollit e Kosovës po përballet me një telash të pazakontë. Atë që e kishte konsideruar punë të lehtë po i del e vështirë, ndërkohë që e vështira po i behet e lehtë.
Kështu zyrtarë të Federatës ankohen se basketbollistët që kanë lindur në Kosovë po refuzojnë të luajnë për Përfaqësuesen në eliminatoret për “Eurobasket 2017”, kurse ata basketbollistë me origjinë nga Kosova që janë lindur e rritur jashtë kanë pranuar të përfaqësojnë vendin e origjinës, shkruan Koha Ditore.
Përfaqësuesja e Kosovës në basketboll – meshkujt, është përfshirë në eliminatoret për Evropianin e vitit të ardhshëm, ka mësuar edhe grupin dhe kundërshtarët, por po has në pengesa të mëdha për të ngritur bazën e ekipit.
Federata ka muaj që ka paralajmëruar zbulimin e emrave të atyre që do të përbëjnë ekipin, por ende nuk e ka bërë. Kjo pasi nuk po mund të bindë lojtarët kosovarë që bëjnë karrierë jashtë vendit të kthehen e të përfaqësojnë Kosovën.
Për këtë drejtuesit e Federatës dhe përzgjedhësi Arben Krasniqi janë fokusuar në ligat e kolegjeve në SHBA, që për një garë si Evropiani mund të mos jen më të duhurit për suksese. Por të tjerë nuk ka. (b.an)