Mëngjesin e sotëm, infermierët dhe mjekët e Urgjencës në Lezhë kanë bërë një protestë, pasi nuk kanë marrë shpërblimin që siç thonë ata u është premtuar nga kryeministri Rama.
Shpërblimi i premtuar nga Qeveria për bluzat e bardha në vijën e zjarrit me COVID 19 duket se do të jetë i dedikuar vetëm për spitalin Infektiv dhe atë “Shefqet Ndroqi”.
Urgjencat e spitaleve rajonale kanë marrë një shpërblim simbolik prej 5 mijë lekësh për ta.
Pas kësaj, personeli i urgjencës në Spitalin Rajonal të Lezhës protestuan në shenjë indinjate ndaj kësaj pagese, e cila sipas tyre nuk është ajo që ju ishte premtuar.
Bluzat e bardha e kanë refuzuar këtë pagesë dhe kanë kërkuar që të shkojë për familjet në nevojë, ndërsa pavarësisht mungesës së vlerimit premtojnë se angazhimi në luftën kundër Covid-19 do të jetë maksimal.
“Refuzojmë këtë shpërblim që ua kalojmë familjeve në nevojë. Ne do të vijojmë punën pavarësisht rrezikut”, thanë ata. /e.s/
