Kancelari gjerman Friedrich Merz, në një intervistë me revistën franceze Paris Match, deklaroi se “të gjithë e kishin gabim në lidhje me Putinin “.
Merz tha se gjithmonë kishte qenë skeptik, por shtoi se Europa duhej ta kishte kuptuar madhësinë e kërcënimit në vitin 2014, kur Rusia pushtoi Krimenë, apo ndoshta edhe më herët, që në vitin 2008, kur sulmoi Gjeorgjinë.
Teksa tha se shpreson se një ditë Europa do të ketë përsëri marrëdhënie të mira fqinjësore me rusët, Kancelari gjerman shtoi se megjithatë jemi shumë larg kësaj.
“Përballemi me regjimin e Putinit, një ‘sistem kleptokratik’ që i është afruar autokracisë gjatë viteve. Le të kujtojmë madhësinë historike të asaj që po ndodh, duke sulmuar Ukrainën, Putin sulmoi vendin e dytë më të madh në kontinentin evropian”, theksoi ai.
I pyetur nëse do të fliste përsëri me Moskën, Merz tha se nëse kjo mund të ishte e dobishme në një farë mënyre, ai do ta bënte këtë.
“Qëllimi është të rikthehemi te rendi dhe respekti i ndërsjellë! Në kohën e bashkimit të Gjermanisë, gjërat nuk ishin të lehta, megjithatë ne punuam me Mikhail Gorbachev. Ky është ekuilibri që dinim pas rënies së BRSS në vitin 1991 dhe deri në vitin 2022. Putin nuk e respekton më këtë ekuilibër. Shpresojmë ta gjejmë përsëri”, vuri në dukje ai.
Së fundmi, në lidhje me marrëdhënien e Evropës me SHBA-në, Merz deklaron se është i bindur se “duke punuar shumë për t’u bërë më të fortë” do të jetë e mundur të negociohet me amerikanët si të barabartë”, ndërsa shtoi se është gati të bashkëpunojë me presidentin francez, Macron, të cilin e quan “mik” të tij, drejt nxjerrjes së Evropës nga “dobësia” dhe “varësia”.
