Banka e Shqipërisë bëri të ditur se, portofoli neto i kredisë për ekonominë shënoi nivelin 532.8 miliardë lekë në fund të muajit shtator 2016.
Sipas BSH-së, që prej fillimit të vitit, kreditimi është rritur me vetëm 2 miliardë lekë. Edhe gjatë shtatorit, përcaktuese ishte ecuria e kreditimit për biznesin. Rënia e portofolit të kredisë për biznesin me rreth një miliard lekë bëri që edhe totali i kredisë për ekonominë të bjerë.
Kredia për biznesin përbën mbi 65% të totalit, ndaj përgjithësisht ecuria e saj është vendimtare në kursin e kreditimit të ekonomisë. Një tjetër rritje, ndonëse në përmasa modeste, regjistroi kredia për individë.
Ndërsa segmenti që është në rritje të qëndrueshme qysh prej vitit të kaluar është kredia për individët. Nga fillimi i këtitj viti, kredia për individë është rritur me mbi katër miliardë lekë.
Pavarësisht se ritmet e rritjes ekonomike janë përmirësuar, kjo nuk po pasqyrohet në më shumë huadhënie. Bankat ngelen ende shumë konservatore, veçanërisht në kreditimin e biznesit, kjo edhe për shkak të nivelit të lartë të kredive me probleme, vëren BSH në raportin e saj./a.m.
