Pa viza, por në pranga, do të udhëtojnë për në Holandë kosovarët që arrestohen nën akuzën e mbështetur në hetimet e zhvilluara përkitazi me pretendimet që janë publikuar në raportin e Këshillit të Evropës, autor i të cilit është senatori Dick Marty. Në Holandë nuk do ta vuajnë dënimin, nëse shpallen fajtorë.
Mbështetur në draftin e marrëveshjes së rënë dakord ndërmjet Qeverisë së Kosovës dhe asaj të Holandës, një kopje të së cilës e ka siguruar edhe “Koha Ditore”, dënimi me burg do të kryhet në një prej shteteve të përcaktuara prej Institucionit Gjyqësor të Specializuar të Rilokuar të Kosovës (IGjSRK), term referencë për selinë e Gjykatës Speciale jashtë Kosovës.
