Operacioni Forca e Ligjit ka vënë në shënjestër sot tre të dënuar të tjerë, të cilët duhet të deklarojnë burimet e pasurisë.
Ata janë Petrit Merja dhe Kreshnik Spahiu, banues në Tiranë, ndërsa i dënuari tjetër, banues në Bulqizë, për veprën penale “Vjedhja me pasoja të rënda”, njihet me tre emra, Aleks Dani alias Aleks Tërnova alias Idajet Tërnova.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
P. M., me banim në Tiranë, i dënuar për veprën penale “Vjedhja me armë”;
K. S., me banim në Tiranë, i dënuar për veprat penale “Vjedhja me armë”, “Vjedhja me dhunë”, “Vrasja me dashje” e mbetur në tentativë, e kryer në bashkëpunim në formën e organizatës kriminale;
A. D. alias A. T. alias I. T., me banim në Bulqizë, i dënuar për veprën penale “Vjedhja me pasoja të rënda”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
