Poeti i njohur Arben Duka në rubrikën e tij të vargjeve ka ironizuar Komisionin e Partisë Demokratike i cili sipas kryedemokratit Lulzim Basha ka sjellë risi në Shqipëri me përzgjedhjen e kandidatëve për deputet.
Me doza të forta kritike dhe humori, Duka thekson se kjo është një fasadë pasi pjesën e listës fituese dhe aleatëve i vendos tjetër kush.
Më poshtë po përcjellim vargjet e plota të poetit.
Në SHQUP për fitore,
po tregon filxhani,
meqë janë kthyer,
Ruli dhe Nishani!
Ruli dhe Nishani,
Marku dhe Besniku,
dhe kjo tani quhet,
hapje-o lum miku!
Në PD lumenjtë,
tani kanë vërshuar,
se mbi 2000 veta,
janë propozuar!
Nga këta Dy mijë,
drejt nga baza vetë,
këta do të zgjedhin,
vetëm Nëntëdhjetë!
Vetëm Nëntëdhjetë,
në balancë të zigjit,
se ka Pesëdhjetë,
Basha sipas ligjit!
Komisioni Ruli,
them është fare kot,
se 50 mandate,
PD-ë s’i merr dot!
Yje mund të gjejnë,
Nishani dhe Ruli,
po pjesën fituese,
e ka në dorë Luli!
Problem më të madh,
ka me kandidatët,
se shumë vende duan,
edhe aleatët!
Nëse opozita,
del me listë unike,
s’ka shumë hapësirë,
- Demokratike!
Ndaj nga SHQUPI vjen,
si me vaj muzika,
Njëzet të sigurtë,
do t’i dojë Monika!
Dhe gjithë të tjerët,
me mënde-pa mënde,
i duan në lista,
të paktën dhjetë vende!
Me ligjin e ri,
të sapo kaluar,
një listë unike,
është e detyruar!
Nëse veç një listë,
nuk do të votojnë,
njeri-tjetrin fort,
do ta konkurrojnë!
Do ketë opozita,
një votë të copëtuar,
dhe nga kjo PS-ja,
del shumë e fituar!
Që të gjitha votat,
vetë do t’i mbajë,
se s’ka aleatë,
që votat t’i ndajë!
Opozita mundet,
të bëjë prokopi,
nëse konkurron,
veç si një parti!
Do ketë probleme domosdo,
opozitë e bashkuar,
se janë vërtetë në një anë,
po s’janë vëllazëruar!.
Ndryshimet që u bënë së fundi,
lejojnë vetëm një thes,
nga tufëzimi LSI-ja,
nuk ka hiç interes!
Dhe rrotacionin fakt të kryer,
e bën veç një idiot,
se nëse rrota është e ndryshkur,
nuk rrotullohet dot!
Rrotë e PD-së tani nuk ka,
as graso dhe as vaj,
edhe një rrotë që s’rrotullohet,
thyen boshtin e saj!
