Tre personat e arrestuar nga SPAK, të akuzuar si pjesë e një grupi të strukturuar kriminal, do të dalin sot (17 prill) para Gjykatës së Posaçme (GJKKO). Personat me inicialet L.p., F.M. dhe A.K., akuzohen si të përfshirë në trafikun ndërkombëtar të drogës nga Amerika Latine drejt vendeve të Europës. Seanca gjyqësore do të drejtohet nga gjyqtarja Alma Kodraliu që ka firmosur më herët masat e sigurisë në dhomë këshillimi.
Aksioni i SPAK u zhvillua të mërkurën (15 prill), ku në total u firmosën 11 urdhër-arreste.
Sipas dosjes hetimore, grupi ka vepruar intensivisht gjatë periudhës 2019-2021. Gjatë kësaj kohe, janë dokumentuar 8 episode të trafikimit të sasive të mëdha të kokainës, me origjinë nga Peruja, Ekuadori dhe Kolumbia, me destinacion kryesor Portin e Roterdamit në Holandë. Ndër rastet më të theksuara përfshihen: Në prill 2020, trafikimi i 1,018 kg kokainë nga Peruja në Roterdam, e fshehur në lëng frutash të ngrira; qershor 2020, trafikimi i rreth 2,020 kg kokainë nga Ekuadori; në gusht 2020, sekuestrimi i 1,238 kg kokainë e fshehur në një ngarkesë me banane nga Ekuadori drejt Roterdamit.
Krahas masave personale të sigurisë, GJKKO ka urdhëruar sekuestron preventive për 232 pasuri të luajtshme dhe të paluajtshme të lidhura në mënyrë të drejtpërdrejtë apo të tërthortë me të dyshuarit. Lista e aseteve të bllokuara, që kap vlerën e 12 milionë eurove.
