Për ish-ambasadorin shqiptar në SHBA, Fator Tarifa, Donald Trump erdhi si një person i jashtëm në zgjedhjet e vitit 2016 dhe prezenca e tij tregon krizën në Partinë Republikane.
Në studion e emisionit “Java në RTSH”, ai shtoi se administrata e presidentit të mundshëm Joe Biden do të ishte një përparësi për shqiptarët. Tarifa tha se gjatë katër viteve në Shtëpinë e Bardhë, Trump nuk u soll asnjëherë si president.
“Pavarësisht parrullave të Trump se Amerika është e para, në fakt u duk se të parat ishin interesat e tij. Ai do të mbahet mend shumë pak dhe jo për mirë. Kërkesa për ndalimin e procesit të numërimit të votave është anti-kushtetuese” – tha diplomati Fatos Tarifa.
Ai u shpreh se liderët evropianë janë të pakënaqur me Donald Trump pasi ai ka qëndruar indiferent ndaj Evropës. Sipas tij, kushdo që të jetë në Shtëpinë e Bardhë nuk do të sjellë ndonjë ndryshim të madh në Ballkan.
Ndërkohë, avokatja e njohur nga SHBA, Era Makoçi, u shpreh se nëse Trump do të refuzonte të linte Shtëpinë e Bardhë kur të konfirmohet humbja etij, atëherë do të thellohej kriza në vend.
“Trump e ka sinjalizuar të mos dalë nga Shtëpia e Bardhë dhe kjo është shokuese. Ai e ka thënë hapur se nuk njeh asnjë rezultat tjetër përveç fitores. Pasi Trump i etiketoi zgjedhjet si false, shtabi i Biden iu përgjigj formalisht me një deklaratë duke u shprehur se: Qeveria e SHBA është e aftë për të nxjerrë jashtë këdo që shkel brenda perimetrit pa autorizim” – tha Makoçi në një lidhje direkte me “Java në RTSH”.
Ndërkohë, sipas ish zv.ministres së Jashtme, Edith Harxhi, Donald Trump nuk ka pasur një politikë izolacioniste. Ajo u shpreh se polarizimi i shoqërisë amerikane ka ekzistuar dhe se Trump thjeshtë e vuri më shumë në dukje.
“Donald Trump ka kthyer në shtëpi më shumë ushtarë amerikanë që ishin nëpër botë dhe ka nënshkruar disa marrëveshje paqeje. Epoka e Trump do të kujtohet edhe për forcimin e Partisë Republikane. Është kandidati i parë i republikanëve në shumë dekada, që ka marrë kaq shumë vota nga minoritetet në SHBA” – tha Harxhi në studion e emisionit Java në “RTSH”.
https://youtu.be/aUCFKeFLRS0
