Tubacionet e gazsjellësit Trans Adriatic Pipeline (TAP) pritet të mbërrijnë në Portin e Durrësit në muajin prill të këtij viti.
Mësohet se ato janë prodhim gjerman dhe pjesa shqiptare e gazjellësit do të përbëhet nga rreth 13,000 tuba të cilët pasi do të vijnë në portin e Durrësit do të vendosen përkohësisht në një hapsirë prej 90,000 m2 pranë Shkozetit.
Pasi të ketë mbërritur pjesa më e madhe e tubave do të fillojë edhe shpërndarja e tyre në zona të afërta dhe pranë gjurmës së gazjellësit.
Procesi i transportit do të nisë që në muajin prill. Nga ana tjetër burime pranë TAP bëjnë të ditur se pjesa më e madhe e tubacioneve do të jenë 18 metra të gjatë, por nuk do të mungojnë edhe ato me gjatësi 12 metra.
Njëkohësisht do të nisë edhe transporti i makinerive të rënda të nevojshme për shtrimin, dhënien e këndeve dhe bashkimin e tubave. Bëhet fjalë për makineri të posaçme që shërbejnë për ndërtimin e tubacioneve të tilla.
