Saimir Vishaj ka hequr petkun e avokatit këtë të mërkurë në studion e “Living Day” të moderatores Brunilda Lahe në Vizion Plus, dhe ka rrëfyer “rikthimin” e tij në jetë, pasi siç ai tregon katër muaj më parë takoi vetë vdekjen.
Avokati i njohur është rikthyer sërish pranë familjes, kolegëve, profesionit dhe qytetarëve për të dhënë kontributin e tij falë mrekullisë që bëri “Zoti dhe mjekët” sipas tij.
Ai ka rrëfyer se ra dy herë në koma dhe aty takoi vdekje, por rikthimi i tij në jetë ishte një mrekulli që mund ta bëjë vetëm Zoti dhe mjekët. Avokati rrëfeu të gjithë dramën dhe kalvarin e katër muajve të fundit.
Pjesë nga biseda:
Saimir Vishaj: Kam qenë në një seancë gjyqësore, pa dalë te dera kam rënë në tokë. Kam qenë në koma për 7 ditë, kam qenë në spitalin “Nënë Tereza”. Gjendja e komës ka vazhduar dhe intubuar, kur u ngrita dhe nuk e di çfarë kam, nuk më kishin gjetur asnjë diagnozë. Më kanë trajtuar shumë shumë mirë, por nuk më gjenin dot një diagnozë, u detyrova të iki në Itali. Sa shkova në shtëpi rashë sërish në koma për 7 ditë. Pastaj kërkova të ikja në një klinikë në Itali. Kam qenë thuajse gjysëm i vdekur. Në Itali më gjetën diagnozën, qendrova për 10 ditë në koma, arritën të zbulojnë që kisha një infeksion në mëlçi dhe zorrën e trashë, dhe nuk më shkonte oksigjeni në kokë. Më bënë një operacion dhe aty më gjetën dhe dy infksione në mushkëri. Pas katër muash kam qendruar i shtrirë, dhe sot jam ngritur në këmbë. Pas katër muajsh kam filluar seancat gjyqësore.
Brunilda Lahe: Ju jeni mësuar që në studio televizive por dhe në sallën e gjyqit flisni për tema të rënda, por sot po flisni për shëndetin tuaj. A keni patur probleme më herët?
Saimir Vishaj: Jo asnjëherë. Isha pak mbi peshë, por kisha nja 3 vjet që pije alkoolike dhe cigare i kisha lënë. Por erdhi momenti që duhet të takoja vdekjen (përlotet). Ka qenë një moment shumë i vështirë.
Brunilda Lahe: Avokat merrnin kohën tuaj për të rrëfyer historinë tuaj.
Saimir Vishaj: Në momentin që isha në koma ishte baraz me vdekjen, por kisha një jetë që më kërkonte. Zoti më solli në jetë. Mbase dhe ekipet mjekësore dhe teknologjia, arrita të jem ky që jam sot. Më falni (përlotet).
Brunilda Lahe: Këto janë mësimet më të vyera që dikush mund të japë. Ja keni hedhur vdekjes.
Saimir Vishaj: Situata ka qenë shumë më e rëndë, qoftë mjekët e Shqipërisë apo mjekët italianë arritën të më rikthenin në jetë. Më dhanë optimizëm, më dhanë forcë, u riktheve në punë, pasi ndihem po ai Saimir. Mundohem të largoj stresin, mundohem ta marr jetën më lehtë, pasi kam punuar 24 orë në ditë në mbrojtje të mijiëra personave. Kam dhënë kontribut për të mbrojtur garancitë proceduriale që kanë patur të pandehurit, por edhe psikolog për familjarët e tyre.
