Ambasadorja e Bashkimit Evropian në Shqipëri, Sofia Moreira de Sousa, ka zhvilluar një takim zyrtar me Ministrin e Drejtësisë, Toni Gogu. Lajmi është bërë i ditur nga zyra e Delegacionit të BE-së në Tiranë përmes një njoftimi në rrjetet sociale.
Në fokus të diskutimeve midis palëve ishte rëndësia e zbatimit të qëndrueshëm të reformës në drejtësi, si dhe domosdoshmëria për të përqendruar përpjekjet te përmbushja e prioriteteve kryesore që lidhen me procesin e anëtarësimit të Shqipërisë në Bashkimin Evropian.
Besimi i publikut dhe konsolidimi i reformave
Gjatë këtij takimi, diplomatja e lartë e BE-së nënvizoi se konsolidimi i sistemit të drejtësisë mbetet një nga shtyllat kryesore në rrugëtimin evropian të vendit.
“Besimi i publikut te sistemi i drejtësisë është thelbësor për të ardhmen e Shqipërisë në BE. Takim i mirë sot me Ministrin e Drejtësisë Toni Gogu, ku diskutuam rëndësinë e zbatimit të qëndrueshëm të reformës në drejtësi dhe nevojën për t’u përqendruar te prioritetet e anëtarësimit në BE. Në pritje të punojmë së bashku për të mbështetur progresin e mëtejshëm.”, theksoi Sofia Moreira de Sousa, ambasadore e BE-së në Shqipëri.
