Nga Mero Baze/
Kryeminstri Edi Rama dhe kancelarja Angela Merkel duket se kanë tejkaluar problemin gjerman të votimit të rekomandimit për hapjen e negociatve, përkundër problemeve që vet partia e Kancelares Merkel ka brenda saj, apo lobimeve të opozitës shqiptare tek ndonjë deputet I veçantë. Takimi në tërësi ka krijuar siguri për votën gjermane, dhe mbi të gjitha I ka dhënë fund spekullimeve se çështja e integrimit mund të bllokohet përmes lobimit.
Por nga ana tjetër ky proces po tregon se Shqipëria do të vazhdoj të përballet me euroskepticizmin, si fenomen që vjen prej lodhjes nga zgjerimi I Evropës dhe që nuk është një problem që vjen nga standartet e Shqipërisë.
Në këtë pikë konsumimi I betejave politike kundër hapjes së negociatave janë të pavlera, pasi janë të pakonsiderueshme në perëndim. Tanimë I vetmi vend skeptik mbetet Franca, jo për shkak të Shqipërisë, as se ka Basha ndonjë mik francez, por për shkak të vizionit të Macron I cili e shikon zgjerimin me dyshim.
Pra edhe nëse Shqipëria ja del ti marrë të gjitha votat e vendeve anëtare dhe nëse dështon në Qershor për një vote, kjo nuk është as meritë e qeverisë nëse ndodh dhe as fitore e opzitës nëse një vend e shtyn votimin për dhjetor. E gjitha tani është më shumë problem evropian se sa shqiptar. Gjermania ishte vendi me më shumë luhajtje brenda shumicës në pushtet në këtë pikë, duke shtuar dhe lobimin e PD, por ky problem duket që nuk ka ndikuar fare në vendimin e Kancelares.
Si problem shqipar ajo u miratua nga Komisioni Evropian I cili bën vlerësimin profesional të situatës dhe këtu mbarojnë debate për arritjen e standarteve apo meritat e Shqipërisë.
Ngrefosja se negociatat do të bllokohen me lobistë është po ashtu naivitet dhe takimi Merkel Rama e tregoi këtë.
Ndaj është mirë që beteja kundër negociatave të pushoi dhe opozita edhe pse nuk e dëshiron këtë, të bëj sikur do, që të paktën të mos I quhet humbje kur të çelen negociatat. Topi nuk është më në fushën tonë, por në secilin parlament të Evropës. Mos të bëjmë kot si tifozë, në një stadium ku nuk kemi akoma biletë për të hyrë.
