Pas takimit trepalësh në Novi Sad, Aleksandar Vuçiç, Zoran Zaev dhe Edi Rama kanë dalë në një konferencë të përbashkët.
Kryeministri shqiptar tha se ky takim vjen nga nevoja për të zhvilluar ekonominë dhe për të luftuar krimin e organizuar.
“Ne nuk mund të jemi peng i së shkuarës në dëm të fëmijëve. Mund të jetë më e lehtë të rrimë në barrikada, por kjo është një zgjedhje e keqe. Ne do të takohemi sërish në Ohër“ – tha shefi i qeverisë shqiptare.
Rama nuk kurseu as ironitë me Bashkimin Evropian. Ai u shpreh se Ballkani Perëndimor nuk mund të presë derisa të zgjidhen mosdakortësitë.
“Miqtë europianë duan të drejtën e autorit kur unë e quaj Schengen, por mund t’i gjejmë një emër tjetër” – tha Rama duke shtuar se deri në fund të vitit 2021 idea e mini-schengenit do të jetë realitet.
“S’ka ndryshim agjende në raport me partnerët ndërkombëtarë, por ka një ndryshim formati që është i ndërtuar mes nesh pa pritur që Bashkimi Evropian të ketë kohë të merret me ne. Le ta themi siç është realiteti, ne nuk jemi prioriteti i BE-së, prioritieti i tyrë është procesi ku kanë hyrë për të reformuar veten. Ne nuk mund të presim të bëhemi prioriteti i BE-së, por të avancojmë duke strukturuar një veprim shumë më aktiv” – tha Kryeministri i Shqipërisë.
Nga ana e tij, Presidenti Aleksandar Vuçiç theksoi se synimi është që qytetarët e Serbisë dhe Shqipërisë të kalojnë kufirin vetëm me kartë identiteti dhe kjo pritet të arrihet deri në vitin 2021.
“Dokumenti që do të shihni bazohet në lëvizjen e lirë të njerëzve dhe shërbimeve, pasi qytetarët tanë meritojnë një jetë më të mirë dhe më pak papunësi.
Qëllimi ynë është që të krijojmë mundësinë që deri në fund të 2021 të kalohet kufiri vetëm me kartë identiteti. Kamionët në Ballkanin Perëndimor humbasin 26 milionë orë pritje”, ka deklaruar Vuçiçl.
Ndërkohë, takimi i radhës midis tre shteteve do të zhvillohet më 10 nëntor, në Ohër të Maqedonisë së Veriut, dhe një muaj më pas liderët do të mblidhen në Shqipëri.
/javanews/a.r
