Kryetari i Partisë Demokratike, Lulzim Basha, ende nuk ka kthyer asnjë përgjigje pas ftesave të kreut të Kuvendit Ilir Meta, ambasadorit të SHBA, por edhe të kryeministrit Rama për një tryezë të nivelit të lartë për gjetjen e konsensusit për Reformën në Drejtësi.
Pas refuzimit nga PD të draftit të Nuland dhe kritikave nga SHBA për gjetjen e kompromisit ishte kryeministri Rama në 13 korrik që ftoi Bashën në një takim për të diskutuar me qëllim arritjen e një marrëveshje.
Ftesës së Ramës, iu bashkua edhe ambasadori i SHBA, Donald Lu që u kërkoi dy liderëve të partive të mëdha takim dhe konsensus.
Ndërkohë që gjatë ditës së djeshme ishte edhe Ilir Meta që kërkoi takim për zgjidhjen e ngërçit 4 ditë para datës së përcaktuar për votimin e Reformës në Drejtësi në Kuvend, por ku të ishin të pranishëm edhe ambasadorët e SHBA dhe BE.
Donald Lu, Romana Vlahutin dhe kryeministri Rama gjatë ditës së djeshme iu përgjigjën pozitivisht ftesës së kreut të Kuvendit, ndërsa ende nuk ka një reagim nga kreu i demokratëve Lulzim Basha.
Përgjigja e Bashës nga reagimi i fundit në faqen e tij në Facebook për ftesën e Ramës ishte “cakto negociatorët, jepu plotfuqinë të negociojnë zgjidhjen” duke lënë të nënkuptohet një shmangie e ballafaqimit direkt.
shqiptarja.com/d.i.
