Në kuadër të takimit të 4-të vjetor të Këshillit Koordinues të Diasporës, Ministri i Jashtëm, Igli Hasani, theksoi rëndësinë e hartimit të politikave konkrete për ruajtjen e identitetit kulturor, gjuhësor dhe të traditave kombëtare të diasporës shqiptare. Ai nënvizoi se ky takim ka për qëllim forcimin e lidhjeve të diasporës me Shqipërinë, si dhe afirmimin e vlerave kombëtare dhe evropiane.
Ministri Hasani theksoi se prioritet do të ketë lehtësimi i pajisjes së tyre me dokumentacion si dhe përthithja e investimeve. Për ministrin bashkëpunimi me diasporën është thelbësor për zhvillimin e politikave që ruajnë gjuhën dhe kulturën shqiptare.
“Ky takim ka për qëllim të përcaktojë hapat e ardhshëm në hartimin e politikave konkrete për ruajtjen e identitetit kulturor, gjuhësore dhe traditave kombëtare. Ky takim tenton të nxis vlerat që afirmojnë jo vetëm identitetin kombëtar por edhe vlerat tona europiane. Ky është një moment i mirë për të përcaktuar një rrugë të qëndrueshme për forcimin e politikës për diasporën dhe integrimi e saj në shoqërinë shqiptare dhe kombëtare. Çështja kombëtare kërkon angazhim dhe bashkëpunim nga të gjitha fushat e shoqërisë dhe për të mbajtur gjallë gjuhën. Të ruajmë dhe të mbajmë gjallë rrënjët dhe identitetin kombëtar dhe ti kalojmë ato brez pas brezi. Progresi dhe arritjet e diasporës kanë qenë të vazhdueshme dhe ka qenë një zë i fuqishëm në shërbim të interesave kombëtare. Përvoja dhe angazhimi juaja në zhvillimet politike, kulturore dhe sociale janë një vlerë e shtuar për politikat tona të përbashkëta.
Puna jonë do të fokusohet në tre drejtim kryesore, lehtësimin lidhjeve të komunitetit shqiptar, lehtësimin e procesit të pajisjes me dokumentacion për shtetasit shqiptar jashtë vendit dhe angazhimin për të nxitur investime nga diaspora për të rritur zhvillimin ekonomin të vendit tonë”, tha Hasani.
Ministri gjithashtu theksoi ndikimin e madh që emigrantët kanë në ekonominë e Shqipërisë, duke sjellë 772 milionë euro gjatë 9 muajve të parë të vitit 2024, përmes dërgesave për të afërmit e tyre, dhe duke kontribuar në rritjen e standardit të jetesës.
Hasani theksoi rëndësinë e bashkëpunimit me Kosovën dhe shqiptarët në rajon, duke e quajtur këtë aleancë një mundësi të shkëlqyer për forcimin e lidhjeve dhe për sigurimin e mbështetjes për projektet që përfitojnë shqiptarët në të gjithë Ballkanin.
“Emigrantët përmes dërgesave kanë në ndikim të madh në ekonominë e Shqipërisë. Gjatë 9 muajve të parë të 2024 emigrantët sollën në vend 772 mln euro për të afërmit të tyre duke kontribuar në rritjen e standardit të jetesës. Ne do punojmë ngushtësisht me diasporën që aktivitetet e tyre të mbështeten nga ambasadat dhe konsullatat shqiptare dhe të ofrojnë asistencën e nevojshme. Bashkëpunimi me Kosovës por edhe me gjithë shqiptarët në rajon do të jetë prioritet dhe për të siguruar mbështetje për projektet që përfitojnë shqiptarët. Kjo aleancë natyrale është e rëndësishme për forcimin e lidhjeve mes shqiptarëve në Ballkan por edhen për të siguruar një të ardhme të përbashkët.
Një mundësi e re është për diasporën është me dyshime në ligjin e ri të marrëdhënieve me jashtë ku do të aplikojnë dhe të bëhen pjesë e shërbimit të jashtëm duke kontribuar me përvojën e tyre në politikat e jashtme të vendit”, u shpreh ministri.
Ky takimi i Këshillit Koordinues të Diasporës është një hap i rëndësishëm për forcimin e politikave për diasporën dhe integrimin e saj më të thellë në shoqërinë shqiptare.
