Takimi i raundit të radhës i dialogut për çështjet e Telekomit me ndërmjetësimin e Bashkimit Evropian është mbajtur dje, me ç’rast, delegacioni i Kosovës, i kryesuar nga ministrja për Dialog, Edita Tahiri, në takime bilaterale me ndërmjetësit e BE-së diskutoi mbi çështjen e zhbllokimit të kodit telefonik për Kosovën, duke theksuar se Serbia po e shkelë marrëveshjen për telekomin sipas të cilës Kosova para disa muajsh është dashur ta merr kodin telefonik nga ITU.
Tahiri edhe me ketë rast konfirmoi se Kosova ka përmbushur të gjitha obligimet zbatuese të marrëveshjes për kodin telefonik me kohë dhe cilësi, mirëpo zvarritjet janë bërë nga ana e Serbisë dhe se deri më tani Serbia nuk ka treguar vullnet politik për t’i kryer obligimet zbatuese.
Ajo kërkoi nga BE që të rritë përpjekjet për ta zhbllokuar çështjen dhe se Kosova sa më parë ta marr kodin nga ITU-ja, si dhe potencoi duke marr parasysh që çështja e telekomit është mbi pesë vjet në tryezën e bisedimeve, tregon qartë mos gatishmërinë e Serbisë për marrëveshjen e telekomit dhe si duket vetëm një ndërhyrje e fuqishme e BE-së mund të bëjë që kjo marrëveshje të zbatohet, raporton Koha.net. (b.an)
