Ministri i Brendshëm Saimir Tahiri i është përgjigjur interesit të gazetarëve në nisje të seancës së Kuvendit.
Gjatë prononcimit të tij, Tahiri i cili mban edhe postin e kreut të PS Tiranë, tha se në parti nuk ka një debat të brendshëm.
Në lidhje me protestat e një grupi socialistësh në dyert e selisë rozë, kreu i Tiranës refuzoi të përgjigjej ndërsa theksoi se PS është në një proces reformimi.
“Sigurisht që do të ketë zgjedhje në të gjitha forumet e PS, përfshirë dhe mandatin e kryetarit. Nëse do bëhet votimi në Kongres apo me një anëtar një votë, kjo më duket debat i shkuar. Ka shumë anëtarësime të reja” – tha Tahiri.
Ai theksoi se mandatet e drejtuesve të PS do të kalojnë në proces rinovimi që bëhet në kongres.
Edhe pse statuti parashikon zgjedhjet sipas parimit një anëtar, një votë, Tahiri tha se kjo mënyrë vlen për rastet kur partia është në opozitë.
