Kryetari i Partisë Socialiste të Tiranës zhvilloi një takim me banorë të Katundit të Ri, në kryeqytet. SaimirTahiri u kërkoi banorëve që pavarësisht çfarë ‘partiçkat’ siç i quajti ai, do t’u ofrojnë, të mos ua japin votën. Për kreun e PS-së së Tiranës në 25 Qershor ka vetëm një zgjidhje dhe ajo është Partia Socialiste.
‘’Po miqtë e mi, në qoftë se ju vijnë këto lloj partish e partiçkash e kandidatësh me lloj-lloj ofertash për para, për benefite, për leje shtëpie, për legalizime, për bursën për djalin, për shkollën për vajzën, merrjani çfarë t’ju japin, votën mos ia jepni. Merrjani çfarë t’u japin votën mos ua jepni. Se praktikisht nuk po ju bëjnë ndonjë nder. Praktikisht po iu kthejnë borxhin. Ju kanë borxh. Ju kanë 25 vjet borxh, po ua kthejnë këtë borxh. Borxhin po ju kthejnë. Po ju kthejnë borxhin, t’ju skllavërojnë atë ditën e zgjedhjeve që për katër vitet e ardhshme t’ju rrjepin prapë. Këtë duan të bëjnë, kështu që mos e lejoni’’, deklaroi ai.
Ish-ministri i qeverisë ‘Rama’ tha se në datën 25, nuk duhet lejuar që qeverisja të kthehet në pazar. Ai nënvizoi se koalicioni i vetëm që Partia Socialiste do të bëjë është ai me qytetarët shqiptar.
‘’Ka shumë njerëz që gjatë takimeve më kanë thënë: ore po mirë, për çfarë i doni më shumë vota, e keni për pushtet? Dhe unë them është shumë e qartë historia, në qoftë se do donim pushtet ne kishim hyrë në zgjedhje në koalicion, do ishte patjetër e fituar. Në qoftë se do donim pushtet ne kishim lënë PD-në dhe Lulin në çadër dhe kishim shkuar vetëm në zgjedhje pa opozitë, kishim mbi 100 mandate. Ne nuk zgjodhëm as njërën dhe as tjetrën. Opozitën e duam në zgjedhje për t’i mundur në zgjedhje përballë dhe kundërshtari mundet. Ndërkohë që hymë vetëm në zgjdhje sepse për ne nuk ka rëndësi si fitojmë. Për ne ka rëndësi si qeverisim nesër ‘’, shtoi ndër të tjera kreu i PS-së Tiranë, Tahiri./a.m.
