Sipas Raportit të fundit të Rregullt Ekonomik për Europën Juglindore (RRrEEJL), rritja ekonomike e Shqipërisë parashikohet të forcohet në vitin 2016, duke i hapur rrugën rritjes së punësimit dhe uljes së varfërisë. Rritja ekonomike në vitin 2016 pritet të jetë 3.2 përqind, krahasuar me nivelin 2.8 përqind në 2015, dhe të arrijë në 3.5 përqind në 2018. Rritja ekonomike në nivel rajonal vlerësohet të arrijë në 2.7 përqind në vitin 2016, nga 2.2 përqind që ishte në vitin 2015. Ritmi i rritjes ekonomike pritet të përshpejtohet përgjatë viteve 2017 dhe 2018.
| 2015 | 2016f | 2017f | 2018f | |
| Rritja e PBB-së Reale (përqind) | ||||
| Shqipëria | 2.8 | 3.2 | 3.5 | 3.5 |
| Bosnja dhe Herzegovina | 3.0 | 2.8 | 3.2 | 3.7 |
| Kosova | 3.9 | 3.6 | 3.9 | 3.7 |
| IRJ e Maqedonisë | 3.7 | 2.0 | 3.3 | 3.7 |
| Mali i Zi | 3.2 | 3.2 | 3.6 | 3.0 |
| Serbia | 0.7 | 2.5 | 2.8 | 3.5 |
| EJL6 | 2.2 | 2.7 | 3.2 | 3.6 |
Raporti vë në dukje se ky përshpejtim i ritmit të rritjes ekonomike po ndihmon në përmirësimin e punësimit në Shqipëri dhe në reduktimin e varfërsisë në rajon. Papunësia ka pësuar rënie. Shkalla e punësimit në Shqipëri gjatë gjysmës së parë të vitit 2016 arriti 6.7 përqind, në sajë të rritjes ekonomike dhe reformave në tregun e punës.
“Kontribuesi kryesor i kësaj rritjeje është Serbia, vendi me ekonominë më të madhe në rajon, rritja ekonomike e së cilës pritet të shkojë nga 0.7 përqind në 2015 në 2.5 përqind për këtë vit” thotë Barbara Cunha, Ekonomiste e Nivelit të Lartë të Bankës Botërore dhe autore kryesore e raportit. “Ekonomitë e tjera në rajon pritet të ruajnë ritmet e rritjes ekonomike nga 2.8 deri në 3.6 përqind, me përjashtim të IRJ të Maqedonisë, e cila përjetoi një ngadalësim ekonomik në ndryshim nga rritja e fortë e vitit të kaluar.”
“Vendet që ndërmorën reforma të thella përjetuan rritje të investimeve, të cilat u kthyen në shtytës të fuqishëm të rritjes ekonomike gjatë gjysmës së parë të vitit 2016, ku investimet private patën kontribut të rënëdësishëm në rritjen ekonomike në Serbi dhe Shqipëri“, thotë Katia Vostroknutova, Ekonomiste e Nivelit të Lartë të Bankës Botërore dhe bashkëautore e raportit. “Deficiti fiskal dhe borxhi publik pësuan gjithashtu rënie si rezultat i reformave që u ndërmorën në këto dy vende“, shtoi Vostroknutova.
Rigjallërimi i konsumit dhe investimet private të mbështetura nga projekte madhore në sektorin e energjisë pritet të udhëheqin rimëkëmbjen ekonomike në Shqipëri, duke kontribuar në 2/3 e saj përgjatë periudhës 2016-2018.
“Konsolidimi i rritjes ekonomike po ndihmon në rritjen e punësimit dhe uljen e varfërisë në rajon,” thekson Ellen Goldstein, Drejtore e Bankës Botërore për Ballkanin Perëndimor. “Megjithëse papunësia në nivel rajonal mbetet e lartë, në rreth 25 përqind, ajo pësoi rënie në të gjitha vendet e Europës Juglindore, me përjashtim të Malit të Zi,” shton Goldstein. “Perspektiva afatshkurtër për rritjen ekonomike mbetet pozitive pavarësisht rreziqeve, por ruajtja e ritmeve të rritjes së fortë ekonomike në kushtet e rreziqeve të rritura kërkon zbatim të reformave që garantojnë qëndrueshmërinë e saj. Ndërmarrja e masave që mund të ndihmojnë, për shembull, në përmirësimin e klimës së biznesit apo rritjen e cilësisë së shërbimeve publike do të sigurojnë qëndrueshmërine e rritjes ekonomike në të ardhmen .” përfundon Goldstein.
Me. Ar
