Tabaku: Do shpenzojmë 25 mln euro në vit për praktikën e të rinjve

Përmes një postimi në rrjetin e saj social, Tabaku ka prezantuar paketën ekonomike për të shpëtuar rininë nga papunësia.

Ja çfarë shkruan ekonomistja dhe mënyra sesi PD do të investojë për të ulur papunësinë e të rinjve.

STATUSI:

Për nje ekonomi të forte e një ardhme te sigurte – Të shpëtojmë rininë! Sot, 1 në 3 të rinj është i papunë apo nuk ka një arsim. Papunësia ndër të rinj është 28.9% në fund të vitit 2016 ndërsa katër vjet më parë ajo ka qenë 27.2%. “Shqipëria është e pashpresë” shprehen 104 mijë të rinjtë që kanë kërkuar azil politik në vendet e BE-së përgjatë katër viteve.

Ne do t’ia rikthejmë shpresën vendit duke mbështetur pa hezitim kredimarrjen e sipërmarrjeve të nisura nga të rinjtë, duke përgjysmuar papunësinë tek to përmes zhvillimit ekonomik, novacioneve teknologjike si dhe zhvillimit të turizmit.

Do të shpezojmë 25 mln euro çdo vit për t’i mundësuar praktikën në fushën e teknologjisë dhe informatikës. Do të ndërhyjmë rrënjësisht në Arsimin e Lartë dhe atë parauniversitar duke i dhënë fokus Arsimit Profesional. Duke u zotuar që të rinjtë shqiptarë që kompletojnë arsimimin e tyre në vitin 2021 do jenë të aftë të konkurojnë lirshëm me moshataret e tyre në Bashkimin e Europian.